لە شەڕی نێوان دوو خێڵ لە زیقاڕ چوار کەس بریندار بوون و دیوەخانێکیش سووتا

ئاڤا نیوز

بەهۆی کێشەیەکی کۆنی نێوان دوو خێڵ لە پارێزگای زیقاڕ، شەڕ و ئاڵۆزی دروست بوو، لەئەنجامدا میوانخانەیەکی یەکێک لە خێڵەکان سووتا و چوار کەسیش بریندار بوون.

چیرۆکی سەرەکی: ئەمڕۆ یەکشەممە، شەڕێکی تووند لە قەزای "سەید دەخیل" لە ڕۆژهەڵاتی باشووری شاری ناسرییە (ناوەندی پارێزگای زیقاڕ) ڕووی دا، میوانخانەیەکی گەورەی یەکێک لە خێڵەکان سووتێنرا و چوار کەسیش برینداربوون.

لێدوانی فەرمی: سەرچاوەیەکی ئەمنی لە زیقاڕ بە ئاڤای ڕاگەیاند: شەڕەکە لەسەر ناکۆکییەکی کۆن لەنێوان خێڵی هەساسەرە و ئال ئیبراهیم سەرلەنوێ هەڵگیرسابووەوە، پەرەی سەندووە بۆ بەکارهێنانی چەک و تووندوتیژی.

سەرچاوەکە دەڵێت: یەکێک لە پاسەوانەکانی پارێزگاری زیقاڕ لە کاتی شەڕەکە لەماڵەوە بووە و بەشێک نەبووە لە شەڕەکە، تەنیا لەبەر ئەوەی سەر بە یەکێک لەو دوو خێڵەیە لە کاتی هاتنە دەرەوەی لە ماڵەکەی تەقەی لێکراوە و بەر شانی کەوتووە و برینداربووە دەستبەجێ ڕەوانەی نەخۆشخانە کراوە.

زانیاریی زیاتر: ئەو سەرچاوەیە ڕوونیشیکردەوە، هێزە ئەمنییەکان دەستبەجێ دوای سەرهەڵدانی شەڕەکە چوونەتە شوێنی ڕووداوەکە و گەمارۆیەکی تووندی ناوچەکەیان داوە و بەهێز کۆنترۆڵی ناوچەکەیان کردووە لەپێناو ڕێگریکردن لە دووبارەبوونەوەی ململانێکان.

بەگوێرەی ئەو سەرچاوە ئەمنییە، "لێکۆڵینەوە سەرەتاییەکان بەردەوامن بۆ دیاریکردنی هۆکارەکانی ڕووداوەکە و ئەوانەی پەیوەندییان پێوە هەیە و دەستگیرکردنیان".