سەرۆک حیزبێکی عێراق سەرسامە بە پڕۆژەکانی هەرێمی کوردستان

ئاڤا نیوز

سەرۆکی حیزبێکی عێراق، سەرسامە بە پڕۆژەکانی خزمەتگوزاری لە هەرێمی کوردستان و بەراوردی دەکات بە شارەکانی ناوەڕاست و باشووری عێراق، دەڵێت، ئەو پارەیەی بۆ شارەکانی ناوەڕاست و باشووری عێراق دابین کراوە "10 جار زیاترە لەو پارەیەی کە بۆ کوردستان دەچێت."

چیرۆکی سەرەکی: سەرۆکی حیزبی ڕوادی وەتەنییە، لە بانگەشەی هەڵبژاردنیدا ستایشی ئاوەدانی و پێشکەوتنی هەرێمی کوردستانی کرد، لە کاتێکدا ڕەخنەی لە حکومەتی عێراق گرت بەهۆی ئەوەی نەیتوانیوە خزمەتگوزارییە سەرەتاییەکان وەک کارەبا، دابین بکات سەرەڕای بوونی داهاتێکی زۆر.

پەیامی فەرمی: لە گوتارێکدا بۆ لایەنگرانی حیزبەکەی، بیلال مالیکی، سەرۆکی حیزبی ڕوادی وەتەنییە پرسیاری کرد، "هەرێمی کوردستان بۆچی ئاوەدانە؟ چونکە حکومەتی دامەزراوەیی هەیە، دەوڵەتە، ڕێبەر و سەرکردەیان هەیە." ئاماژەی بەوەدا کە پڕۆژەکانی حکومەتی هەرێمی کوردستان، بەتایبەتی ئەوانەی مەسرور بارزانی سەرۆکوەزیرانی کوردستان سەرپەرشتییان دەکات، سەرسامیی زۆری لای لایەنە عێراقی و کوردستانییەکانیش دروست کردووە.

مالیکی بە بەراوردکردنێک ئاشکرای کرد کە ئەو پارەیەی بۆ شارەکانی ناوەڕاست و باشووری عێراق دابین کراوە "10 جار زیاترە لەو پارەیەی کە بۆ کوردستان دەچێت." وتی، باشە پارەی پارێزگاکانی عێراق چی لێهات؟ لە کاتێکدا هەرێمی کوردستان هەتا بێت ئاوەدانتر دەبێتەوە و کارەبایان 24 کاتژمێریە، ئەی پارەی کارەباکەی ئێمە چی لێهات؟