هێزە ئەمنییەکانی عێراق هەوڵێکی بەقاچاخهێنانی ماددەی هۆشبەر پووچەڵ دەکەنەوە

ئاڤا نیوز

ئەمڕۆ یەکشەممە، فەرماندەیی هێزە سنوورییەکانی عێراق پووچەڵکردنی هەوڵێکی نوێی بەقاچاخبردنی ماددەی هۆشبەر لە ڕێگەی باڵۆنی هەواییەوە بەدرێژایی سنوور ڕاگەیاند.

ڕاگەیێنراوی فەرمی: فەرماندەییەکە لە ڕاگەیێنراوێکدا ئاماژەی بەوەکردووە، "هێزێکی لیوای شەشی سنوور، بە هاوبەشی لەگەڵ بەڕێوەبەرایەتیی ماددە هۆشبەرەکان و کارتێکەرە دەروونییەکان هەوڵێکی نوێی قاچاخچێتییان لە ڕێگەی باڵۆنی هەوای گەرمەوە پووچەڵ کردووەتەوە".

زانیاریی زیاتر: بە گوێرەی فەرماندەییەکە "22 کیلۆ و 960 گرام حەبی کەپتاگۆنی لەناو باڵۆنێکدا هەبووە، قاچاخچییەکان هەوڵیانداوە بە قاچاخ بیهێننە ناو وڵاتەکەوە".

لەلایەکی دیکەوە: هەفتە ڕابردوو، هێزە ئەمنییەکانی عێراق بە هەماهەنگی لەگەڵ هەواڵگریی سووریا، ئۆپەراسیۆنێکی بۆ دەستگیرکردنی بازرگانانی ماددە هۆشبەرەکان لەنێو خاکی سووریا ئەنجامدا  و چەند تۆمەتبارێکیان دەستگیرکرد.