پێنتاگۆن ڕەخنە لە فیلمێکی نێتفلێکس دەگرێت: توانای بەرگریی ئەمریکاتان لاواز نیشانداوە

ئاڤا نیوز

وەزارەتی جەنگی ئەمریکا (پێنتاگۆن) بە تووندی ڕەخنەی لە فیلمێکی نوێی نێتفلێکس بە ناوی "هاوس ئۆف داینەمیت" گرتووە، بە بیانووی ئەوەی فیلمەکە سیستمی بەرگری مووشەکی ئەمریکای بە لاواز نیشانداوە و  "بۆ سەرنجڕاکێشانی بینەران" وەسفی کردووە.

چیرۆکی سەرەکی: فیلمی "هاوس ئۆف داینەمیت" باس لە وەڵامدانەوەی ئەمریکا بۆ هێرشێکی چەکی ئەتۆمی دەکات. لە ترایلەری فیلمەکەدا سەرۆکی ئەمریکا و بەرپرسانی دیکە دەردەکەون کە سەرقاڵی گفتوگۆن لەسەر چۆنیەتی خستنەخوارەوەی مووشەکێکی ئەتۆمی کە بەرەو ئەمریکا هەڵدراوە.

یەکێک لە خاڵە سەرەکییەکانی ناکۆکیی نێوان پێنتاگۆن و فیلمەکە، ئەو دیمەنەیە کە تێیدا کەسێک ڕۆڵی وەزیری جەنگی ئەمریکا دەبینێت و گلەیی ئەوە دەکات کە سیستمی بەرگری مووشەکی تەنیا بە ڕێژەی 50% دەتوانێت ڕێگری لە هێرشەکە بکات، لە کاتێکدا تێچووی سیستمەکە 50 ملیار دۆلارە.

کاردانەوەکان: پێنتاگۆن ئەم دیمەنە بە چەواشەکارانە دەزانێت و ڕایگەیاندووە کە فیلمەکە وا نیشاندەدات سیستمی بەرگریی ئەمریکا ناتوانێت ڕێگری لە مەترسییەکان بکات، کە ئەمە تەنیا بۆ سەرنجڕاکێشانی بینەرانە و لە ڕاستیدا بەو شێوەیە نییە. پێنتاگۆن جەختی لەوە کردەوە کە ئێستا سیستمەکانیان "بە ڕێژەی 100% وردن لە ڕێگری کردن لە مەترسییە مووشەکییەکان."

پێنتاگۆن لە ڕێگەی پێگەی بلومبێرگەوە ڕایگەیاندووە کە بۆ ئامادەکردنی ئەم فیلمە، ڕاوێژیان پێنەکراوە و فیلمەکە ڕەنگدانەوەی بۆچوون و کارە لەپێشینەکانی ئیدارەی سەرۆک ترەمپ نییە، ئەمەش ئاماژەیە بۆ ئەوەی کە فیلمەکە زانیاریی ورد و نوێی حکومەتی ئەمریکای لەبەرچاو نەگرتووە.