حکومەتی هەرێمی کوردستان ڕەزامەندیی لێدانی بیری کشتوکاڵی لە مەخموور دەدات

ئاڤا نیوز

حکومەتی هەرێمی کوردستان ڕێگە بە جووتیارانی سنووری قەزای مەخموور دەدات، دووبارە دەست بە مامەڵەکانیان بۆ لێدانی بیر لە ناو زەوییەکانیان بکەن، ئەویش بەپێی ڕێكار و ڕێنمايیەكانی بەڕێوەبەرایەتیی ئاوی ژێر زەویی پارێزگای هەولێر دەبێت.

چیرۆکی سەرەکی: ئەمڕۆ یەکشەممە 26-10-2025، مەسرور بارزانی، سەرۆکی حکومەتی هەرێمی کوردستان لە میانەی کردنەوەی پرۆژەی مێگەڵ لە سنووری ناحیەی گوێڕ، بڕیاری دا هاوشێوەی قەزاکانی دیکەی هەولێر، لە سنووری قەزای مەخمووریش جووتیاران دەست بە مامەڵەی لێدانی بیر بکەنەوە.

لێدوانی فەرمی: ڕزگار محەممەد، قایمقامی قەزای مەخموور بە ئاڤا میدیای ڕاگەیاند، لە بەیانیی ڕۆژی دووشەممە 27-10-2025، "کار بەو ڕێنماییە نوێیە دەکەین بۆ ڕاییکردنی مامەڵەی لێدانی بیر"،  هاووڵاتیان و جووتیارانی سنوورەکەمان دەتوانن بێن داواکارییەکانیان پێشکەش بە هۆبەکانی کشتوکاڵی و بەڕێوەبەرایەتیی ناحییەکان بکەن.

زانیاریی زیاتر: لێدانی بیری ئیرتیوازی، بەپێی ڕێكکار و ڕێنمايیەكانی بەڕێوەبەرایەتیی ئاوی ژێر زەویی سەر بە پارێزگای هەولێر و بەپێی جۆر و شوێنی زەوی و دوور و نزیکی نێوان بیرەکان ئەنجام دەدرێت.

هۆکارە زانراوەکان: ماوەیەک پێش ئێستا بە بڕیارێکی ئەنجوومەنی وەزیرانی هەرێمی کوردستان بە هۆکاری ڕێکخستنەوە و هەماهەنگی لەگەڵ ئیدارەی پارێزگای نەینەوا، مۆڵەت و ڕێپێدانی بیری ئیرتیوازی ڕاگیرا بوو.

ئەمەش بزانە: بڕیارەکە تەواوی سنووری قەزای مەخموور بە تەواوی ناحییەکان، وەک (مەلاقەرە و كەندێناوه و گوێڕ و قەراج) دەگرێتەوە.