ژمارەیەك ژن و منداڵی دیكەی ئەندامانی داعش، كەمپی هۆل جێدەهێڵن

ئاڤا نیوز

هەوڵەكان بۆ چۆڵكردنی كەمپی هۆل بەردەوامی هەیە؛ لە هەنگاوێكی نوێدا 38 ژن و 16 منداڵ گەڕێندرانەوە پارێزگاكانی خۆیان لە سووریا.

چیرۆكی سەرەكی: یەكەی پشتیوانیی سەقامگیری، كە ڕێكخراوێكی ناحكومییە، بەهەماهەنگی لەگەڵ ئیدارەی خۆسەر لە ڕۆژئاوای كوردستان و حكومەتی نوێی سووریا، هەڵمەتێكی بۆ چۆڵكردنی كەمپی هۆل لە ڕۆژی 16ـی مانگی حوزەیرانی ئەمساڵەوە دەستپێكردووە، لەو چوارچێوەیەشدا 38 ژن و 16 منداڵ كە خەڵكی پارێزگا جیا جیاكانی سووریان، لە كەمپەكە دوورخرانەوە.

لێدوانی فەرمی: مونزیر ئەلسەلال، بەڕێوەبەری جێبەجێكاری یەكەی پشتیوانیی سەقامگیری لە لێدوانێكی ڕۆژنامەوانیدا ڕایگەیاند، بەشێكی دیكە لە ژن و منداڵە نیشتەجێبووەكانی نێو كەمپی هۆل لەچوارچێوەی پرۆژەی "هیوای 3" لەژێر ڕێوشوێنی ئەمنیی تۆكمە و لەبەرچاوگرتنی لایەنی مرۆیی، كەمپی هۆلیان جێهێشت و هەریەكەیان لە پارێزگاكانی خۆیان لەلایەن یەكە تایبەتمەندەكانی سەر بە حكومەتی سووریا پێشوازییان لێكرا.

- بەڕێوەبەری جێبەجێكاری یەكەی پشتیوانیی سەقامگیری دووپاتی كردەوە، مەبەستیانە پرۆسەی چۆڵكردنی كەمپی هۆل خێراتر بكەن، بەڵام ئاستەنگ و دۆخی هەستیاریی كەمپەكە، پرۆسەكەی خاو كردووە، و هێشتا لەنێوان 13 هەزار بۆ 14 هەزار كەس لە كەمپەكەدا ماون.

باكگراوند: كەمپی هۆل دەكەوێتە پارێزگای حەسەكە لە ڕۆژئاوای كوردستان، سەرەتا بۆ لەخۆگرتنی ئەو پەنابەرە عێراقیانە دروستكرا كە لە ململانێكانی ساڵی 2003ـی عێراق و لەكاتی هێرشی ئەمریكا بۆ سەر ئەو وڵاتە، هەڵدەهاتن و ڕوویان لە سووریا دەكرد.

- بەڵام دوای سەرهەڵدانی داعش و لەناوبردنی ئەو ڕێكخراوە تیرۆرستییە لە سووریا و عێراق، كەمپەكە بووە پەناگەی هەزاران ئەندامی داعش كە خۆیان و ژن و منداڵەكانیان ڕادەستی هێزە كوردییەكان كرد كە ئەركی بەڕێوەبردن و سەرپەرشتیكردنی كەمپەكەیان لەئەستۆدایە.

- ڕێكخراوە نێودەوڵەتییەكان چەندین جار هۆشدارییان داوە لە مەترسیی پەرەسەندنی تووندوتیژی و لە كۆنتڕۆڵ دەرچوونی ئاسایشی كەمپەكە، بەهۆی بوونی ژمارەیەكی زۆری پاشماوەكانی داعش كە لە شێوەی شانەی نووستووی ڕێكخراوەیی كاردەكەن.