سەرۆکوەزیرانی کوردستان ئەمڕۆ لە سۆران دەبێت

ئاڤا نیوز

پێشنیوەڕۆی ئەمڕۆ سەرۆکوەزیران مەسرور بارزانی دەچێتە سۆران، یەکێک لە پڕۆژەکان دەکاتەوە و دوو پڕۆژەی گرنگی دیکەش بەسەر دەکاتەوە، دوانیوەڕۆش لە کەرنەڤاڵی سەرخستنی لیستی پارتی وتارێک بۆ جەماوەری دەڤەرەکە پێشکەش دەکات.

چیرۆکی سەرەکی: سەرۆکوەزیران مەسرور بارزانی، سەرەتا کارەکانی ماستەرپلانی گەشتیاری گەلی عەلی بەگ بەسەردەکاتەوە، کە دەبێتە یەکێک گەورەترین پڕۆژە گەشتیارییەکان لەسەر ئاستی ناوچەکە، دواتر بەرزەپردی دەروازەی سۆران دەکاتەوە و پڕۆژەی شەقامی 40 مەتری سۆران بەسەردەکاتەوە.

لێدوانی فەرمی: سامان محەممەد، بەڕێوەبەری پڕۆژەی شەقامی 40 مەتری بە ئاڤای گوت، "کارەکانی بەرزەپردی دەروازەی سۆران ساڵێک پێش وادەی خۆی تەواو بووە، لە کاتێکدا 900 ڕۆژ بۆ تەواوکردنی دیاریکرابوو، هاوکات شەقامی 40 مەتری سۆران هەنگاوی باشی بڕیوە و مانگی سێی ساڵی داهاتوو واتا شەش مانگ پێش وادەی دیاریکراوی خۆی دەکرێتەوە."

ئەوەی پێویستە بیزانیت: شەقامی 40 مەتری ماوەکەی سێ کیلۆمەتر و 200 مەترە، بەرزە پردێک لەخۆدەگرێت بە درێژی 290 مەتر و بەرزی 32 مەتر، ئەم شەقامە دەبێتە هۆکارێک بۆ کەمکردنەوەی قەڵەباڵغی ناوشار و بەستنەوەی هەردوو قەزای سیدەکان و مێرگەسۆر بە سەنتەری قەزای ناوەندی سۆران.

زانیاریی زیاتر: لەبەشێکی دیکەی سەردانەکەی بۆ سۆران سەرۆکوەزیران مەسرور بارزانی،  بەرزە پردی دەروازەی سۆران دەکاتەوە کە پڕۆژەکە لە دوو بەرزە پرد پێک دێت، درێژی یەکێکیان 154 مەتر، بەرزی 15 مەتر و پانی 11 مەترە، بەرزە پردی دووەم درێژی 57  مەتر، بەرزی 8 مەتر و پانی 11مەترە. 

گۆشەیەکی دیکەی دیمەنەکە: لە چوارچێوەی سەردانەکەی مەسرور بارزانی بۆ سۆران، دوانیوەڕۆ لە یاریگەی دێلزیان کەرنەڤاڵی سەرخستنی لیستی 275ـی پارتی بەڕێوەدەچێت و جێگری سەرۆکی پارتی وتارێک پێشکەش دەکات.