مەسرور بارزانی بۆ ئاڤا: ئامانجمان ئەوەیە ڕێگای نێوان شارەكان بە دووساید بەیەكەوە ببەستینەوە

ئاڤا نیوز

 

سەرۆكوەزیران بارزانی لەكاتی بەسەرکردنەوەی پڕۆژەی شەقامی 40 مەتری لە ئیدارەی سەربەخۆی سۆران بۆ ئاڤا قسەی کرد و وتی، "دەمانەوێت شارەكان بە ڕێگای دووساید بەیەكەوە ببەستینەوە".

 

چیرۆكی سەرەكی: ئەمڕۆ دووشەممە سەرۆكوەزیران مەسرور بارزانی، بەشێك لە پرۆژەكانی سنووری ئیدارەی سەربەخۆی سۆرانی بەسەركردەوە، هاوكات بەرزەپردی دەروازەی سۆرانی بەفەرمی بەڕووی هاتووچۆدا كردەوە.

 

لێدوانی فەرمی: لەکاتی کردنەوەی بەرزەپردی دەروازەی سۆران، سەرۆکوەزیران مەسرور بارزانی بە ئاڤای گوت، كردنەوەی ئەم ڕێگایەش، بەشێکە لەو پڕۆژانەی حکومەتی هەرێمی کوردستان بۆ پەرەپێدانی کەرتی ڕێگاوبان هەیەتی، كارئاسانیی زیاتر بۆ گەشتیاران دەكات كە سەردانی ئەم دەڤەرە سەرنجڕاكێشە بكەن.

 

ئاماژەی بەوەشكرد، لە پرۆژەكانی ڕێگاوبان، سەلامەتیی هاووڵاتییانمان لا مەبەستە، لەسەر ئەو بنەمایەش ئەم پرۆژە بە ئاست و ستانداردێكی بەرز بۆ خزمەتی هاووڵاتیان دروستكراوە. هیوایشی خواست هاووڵاتیانیش بۆ سەلامەتیی خۆیان پابەندیی ڕێنماییەكانی هاتووچۆ بن.

 

لەلایەکی دیکەوە: لەکاتی بەسەرکردنەوەی شەقامی 40 مەتریی سۆران سەرۆکوەزیرانی کوردستان وتی، ئەم پڕۆژەیەی دەستیپێکردووە لەماوەیەکی زوودا تەواو دەکرێت، ئامانجمان ئەوەیە ڕێگاوبانەکان باشتر بکەین و سەرنجی خەڵکی زیاتر بۆ ئەم ناوچەیە ڕابکێشین و دەرفەتی کاری زیاتر بۆ خەڵکی ئەو ناوچەیە بڕەخسێنین. دەمانەوێت ڕێگای نێوان هەموو شارەکان بە دووساید بەیەکەوە بیبەستینەوە.