مەسرور بارزانی: ئەم هەفتەیە کارەبای هەموو سۆران دەبێتە 24 کاتژمێری

ئاڤا نیوز

کارەکانی پڕۆژەی ڕووناکی لە ئیدارەی سەربەخۆی سۆران کۆتایی هاوتووە، مەسرور بارزانی مژدەی کارەبای 24 کاتژمێری بە دانیشتووانی سۆران دەدات، دەڵێت ڕۆژی پێنجشەممە بەفەرمی کارەبای سۆران دەکرێتە 24 کاتژمێری.

وێنە گەورەکە: یەکێک لە پڕۆژە ستراتیژەکانی کابینەی نۆیەمی حکومەتی هەرێمی پڕۆژەی ڕووناکی بوو، کە کارەبای 24 کاتژمێری بۆ دانیشتووانی هەرێمی کوردستان دابین دەکات، لەئێستادا زیاتر لە 50%ـی دانیشتووانی هەرێمی کوردستان کارەبای 24 کاتژمێریان بۆ دابینکراوە، بڕیارە تا کۆتایی ساڵی 2026 تەواوی هەرێمی کوردستان ببێتە کارەبای 24 کاتژمێری، ڕۆژی پێنجشەممەش پڕۆژەی ڕووناکی بە فەرمی لە سەنتەری ئیدارەی سەربەخۆی سۆران دەکەوێتە کار.

لێدوانی فەرمی: مەسرور بارزانی، جێگری سەرۆکی پارتی دیموکراتی کوردستان، لە هەڵمەتی بانگەشەی پارتی لە سۆران ڕایگەیاند، ڕۆژی پێنجشەممە بەفەرمی کارەبای سەنتەری سۆران دەبێتە 24 کاتژمێری و هەموو خێزانێک کارەبای بەردەوامی دەبێت، هاوکات ڕۆژ لە دوای ڕۆژ پڕۆژەی زیاتر بۆ سۆران ئەنجامدەدەین، کێشەی کارەبا 30 ساڵە عێراق بە دەستیەوە دەناڵێنێت ئەمجارە ئێمە توانیمان ئەم کێشەیە چارەسەر بکەین.

زانیاریی زیاتر: مەسرور بارزانی، ئاماژەی بەوەکرد، بەلای ئێمەوە حکومەت بۆ خزمەتگوزارییە نەک بۆ دەستکەوت، پێداگری دەکەین حکومەتێکی خزمەتگوزار لە هەرێمی کوردستان پێکبێت، دوور بێت لە بەرژەوەندی تاکە کەسی و دەستکەوتی تاکە کەسی، حکومەتێک بێت لەشکر بە بڕیاری تاکە کەسی جووڵەی پێ نەکرێت و داهات بۆ خەزێنەی گشتی بگەڕێتەوە و خزمەتی هاووڵاتیانی کوردستانی پێ بکرێت.