مەسرور بارزانی لە دهۆک پڕۆژەیەک بە گوژمەی 591 ملیۆن دۆلار دەکاتەوە

ئاڤا نیوز

مەسرور بارزانی سەرۆکوەزیرانی کوردستان، سبەی لە دهۆک، پڕۆژەی ڕاكێشانی هێڵی غازی سرووشتی هەولێر - دهۆک دەکاتەوە، کە ئامانج لێی گەیاندنی غازی سرووشتییە بۆ وێستگەی کارەبای کواشێ لە قەزای سێمێل.

وێنە گەورەکە: کابینەی نۆیەم بەسەرۆکایەتی مەسرور بارزانی، بەردەوامە لە جێبەجێکردنی پڕۆژە خزمەتگوزارییەکان لە سەرجەم ناوچە جیاوازەکانی هەرێمی کوردستان، پڕۆژەی ڕاکێشانی بۆریی غازی هەولێر - دهۆک یەکێكە لە پڕۆژە گرنگەکانی دابینکردنی کارەبا.

زانیاریی زیاتر: پرۆژەکە لە قەزای سێمێڵە و یەكێكە لە پڕۆژە هەرە گرنگەكان بۆ ژێرخانی ئابووریی كوردستان. ئامانجی پرۆژەکە ئەوەیە، غازی سرووشتی بگەیێنرێتە وێستگەی كارەبای هەزار مێگاواتی کواشێ لە قەزای سێمێل.

بۆچی گرنگە: کردنەوەی پڕۆژەکە، هەنگاوێكی گرنگە بۆ دابینكردنی وزەی جێگرەوە بۆ دابینکردنی کارەبای دەڤەرەكە. 

درێژی بۆریی پڕۆژەکە 192 كیلۆمەترە و بە بڕی 591 ملیۆن دۆلار لەلایەن كۆمپانیای كارەوە جێبەجێ كراوە.