کۆمیسیۆن 11 کاندیدی بەهۆی "ساختەکردنی بڕوانامە" دوورخستووەتەوە

ئاڤا نیوز

کۆمیسیۆنی هەڵبژاردنەکانی عێراق 837 کاندیدی بەهۆکاری جیاواز لە کێبڕکێی هەڵبژاردنەکان دوورخستووەتەوە، لەو ژمارەیەش 11ـیان بەهۆی ساختەکردنی بڕوانامەی خوێندن بووە کە یەکێکیان کاندیدێکی لیستی یەکێتیی نیشتمانیی کوردستانە لە بازنەی سلێمانی.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بۆ ئاڤا ئاشکرای کرد، 837 کاندید بەهۆکاری جیاواز دوورخراونەتەوە.

بڵاوکراوەی فەرمی: ئەنجوومەنی کۆمیسیارانی کۆمیسیۆنی هەڵبژاردنەکانی عێراق بڕیاریداوە، لەیلا کەریم حەمادی، کاندیدی ژمارەی 20ـی یەکێتیی لە بازنەی پارێزگای سلێمانی لە کێبڕکێی هەڵبژاردن دووربخاتەوە، ئەوەش بەهۆکاری ئەوەی بڕوانامەی خوێندنی ساختە کردووە.

کۆمیسیۆن دەشڵێت، بڕیاری دوورخستنەوەی ئەو کاندیدە دوای ئەوە دراوە، وەزارەتی پەروەردە بە نووسراوی فەرمی ئاگاداریی کردوونەتەوە کە بڕوانامەی ئەو کاندیدە ساختەیە. 


ئەوەی پێویستە بیزانیت: یەکێک لە مەرجەکانی خۆ کاندیدکردن بۆ هەڵبژاردنی پەرلەمانی عێراق ئەوەیە  دەبێت کاندیدەکە لایەنیکەم بڕوانامەی ئامادەیی هەبێت یان هاوتاکەی، هاوکات لەلایەن هەموو وەزارەتە پەیوەندیدارەکانیشەوە پشکنینی بۆ دەکرێت.