حەماس: پابەندین بە ئاگربەست و پەیوەندیمان بە هێرشی ڕەفحەوە نییە

ئاڤا نیوز

بزووتنەوەی حەماس ڕەتی دەکاتەوە دەستی لە شکاندنی ئاگربەستی غەززەدا هەبێت و ئیسرائیل تۆمەتبار دەکات بە پێشێلکردنی ڕێککەوتنەکە.

 

چیرۆکی سەرەکی: دوای دوو هەفتە لە وەستانی شەڕ، بە فەرمانی ڕاستەوخۆی بنیامین نەتەنیاهۆ، سەرۆکوەزیرانی ئیسرائیل، هێرشی ئیسرائیل بۆ سەر کەرتی غەززە دەستیپێکردەوە، ئەمەش دوای کوژرانی ئەفسەر و سەربازێک و برینداربوونی سەربازێکی دیکەی لە ڕەفح لە باشووری کەرتی غەززە.

 

ڕاگەیێنراوی فەرمی: بزووتنەوەی حەماس لە ڕاگەیێنراوێکدا دووپاتی کردەوە کە "هیچ پەیوەندییەکی بە ڕووداوی تەقەکردنەکەی ڕەفحەوە نییە و جەخت لە پابەندبوونی خۆی بە ڕێککەوتنی ئاگربەست دەکاتەوە." حەماس ئاماژەی بەوەشدا، بۆردوومانی ئیسرائیل بۆ سەر ناوچەکانی کەرتی غەززە، پێشێلکارییەکی ڕوونی ڕێککەوتنی ئاگربەستە کە لە شاری شەرم شێخ بە سەرپەرشتی دۆناڵد ترەمپ، سەرۆکی ئەمریکا، واژۆ کرا.

 

مەترسییە پێشبینیکراوەکان: حەماس ئاماژەی بەوەدا "ئەم هێرشە بەردەوامیی پێشێلکارییەکانی چەند ڕۆژی ڕابردووە، لەوانەش هێرشەکان کە بوونەتە هۆی کوژران و برینداربوونی خەڵک و بەردەوامبوونی داخستنی دەروازەی ڕەفح، ئەمەش دووپاتی دەکاتەوە کە سوورن لەسەر پێشێلکردنی بڕگەکانی ڕێککەوتنەکە و هەوڵدان بۆ لەناوبردنی.

 

داواکاریی فەرمی: حەماس داوای لە نێوەنگیرانی گەرەنتیی ڕێککەوتنەکە کرد "دەستبەجێ هەنگاو بنێن بۆ گوشار خستنە سەر ئیسرائیل و ڕاگرتنی هەڵکشانی دڕندانەی دژی هاووڵاتیانی سڤیل لە کەرتی غەززە و ڕاگرتنی پێشێلکارییە ترسناکەکانی بۆ ڕێککەوتنی ئاگربەست و ناچارکردنی بە پابەندبوون بە هەموو بڕگەکانی.

 

ئەوەی ئێستا ڕوودەدات: ئێوارەی سێشەممە چەند تەقینەوەیەک غەززەی هەژاند، دوای ئەوەی بنیامین نەتەنیاهۆ لە کۆتایی کۆبوونەوەیەکی ئەمنیدا، سوپای وڵاتەکەی ڕاسپارد دەستبەجێ "هێرشی بەهێز" لە کەرتی غەززە ئەنجام بدەن.