باڵیۆزی ڕووسیا لەڕێگەی ئاڤاوە هۆکاری قورسی پێدانی ڤیزەی وڵاتەکەی بە عێراقییەکان ئاشکرا دەکات

ئاڤا نیوز

 

باڵیۆزی ڕووسیا لە عێراق ڕایدەگەیێنێت، پرۆسەی وەرگرتنی ڤیزا بۆ هاووڵاتیانی عێراق بۆ سەردانیکردنی ڕووسیا ئاسان نییە و ئەمەش نیگەرانیی خۆی هەیە، ڕوونی دەکاتەوە کە ئەم ڕێوشوێنانە لەبەر هۆکاری ئەمنیی گشتین و دژ بە عێراق یان عەرەبەکان نین و بەڵێنی هەوڵدان بۆ چارەسەرکردنی کێشەکە دەدات.

 

چیرۆکی سەرەکی: ئێلبروس کۆتراشێڤ، باڵیۆزی ڕووسیا لە عێراق، لە دیمانەیەکی تایبەتیدا لەگەڵ ئاڤا میدیا لە بەشێک لە قسەکانی باسی پرۆسەی پێدانی ڤیزای بە هاووڵاتیانی هەرێمی کوردستان و عێراق کرد.

 

لێدوانی فەرمی: ئێلبروس کۆتراشێڤ، باڵیۆزی ڕووسیا لە عێراق، دانی بەوەدا نا کە پرۆسەی وەرگرتنی ڤیزا بۆ عێراقییەکان بۆ سەردانیکردنی ڕووسیا ئاسان نییە و ئەویش "دڵخۆش نییە" بەم دۆخە.

 

هۆكارە زانراوەكان: باڵیۆز ڕوونی کردەوە کە ئەمە لە دەستی باڵیۆزدا نییە و ئەم ڕێوشوێنە ئەمنییە بیرۆکراتییانە ساڵانێک لەمەوبەر دانراون بەهۆی ڕووبەڕووبوونەوەی چەند ئاستەنگێکی ئەمنی، نەک وەک کردەیەک دژ بە عێراقییەکان. ئەو جەختی لەوە کردەوە کە "عێراق دۆستی ئێمەیە" و پێویستە هاووڵاتیانی عێراق بتوانن بە ئاسانی سەردانی ڕووسیا بکەن.

 

ئەوەی پێشبینی دەکرێت: کۆتراشێڤ هیواخوازە ئەم کێشەیە چارەسەر بکرێت، بەڵام ئاماژەی بەوەدا کە بەهۆی هێرشە تیرۆریستییەکانی ئۆکرانیا و هاوپەیمانەکانی بۆ سەر ڕووسیا، چارەسەرکردنی کێشەکە بەم زووانە نابێت. ئەو پشتگیری گەشتیاریی بازرگانی، کولتووری و تەندروستی عێراقییەکان بۆ ڕووسیا دەکات و دڵنیایە چارەسەرێک دەدۆزرێتەوە.