سایلۆیەک بۆ جووتیارانی کۆیە و تەقتەق دروست دەکرێت

ئاڤا نیوز

بەبڕیاری سەرۆکوەزیران مەسرور بارزانی، سایلۆیەک بۆ جووتیارانی سنووری کۆیە و تەقتەق دروست دەکرێت و لە چەند ڕۆژی داهاتوو بەردی بناغەی پڕۆژەکە دادەنرێت.

 

وێنە گەورەکە: جووتیارانی سنووری قەزای کۆیە ساڵانە هەزاران تۆن گەنم بەرهەم دەهێنن، بەڵام بەهۆی سنوورداریی توانای وەرگرتنی ئەو سایلۆیەی ئێستا بەشێکی زۆریان ناچارن بەرهەمەکانیان بگوازنەوە هەولێر و شارەکانی دیکە.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "زەوییەک بە ڕووبەری 25 دۆنم تەرخانکراوە، لە چەند ڕۆژی داهاتوو بەردی بناغەی دادەنرێت و لەماوەی دوو ساڵدا تەواو دەبێت، هاوکات ئەو سایلۆیەی ئێستا تێکنادرێت بۆ ئەوەی لەو دوو ساڵەدا جووتیاران بەرهەمەکانیان لەوێ کۆگا بکەن."

 

زانیاریی زیاتر: جووتیارانی سنووری کۆیە ساڵانە 60 بۆ 80 هەزار تۆن گەنم بەرهەم دەهێنن، ئەو سایلۆ نوێیەی دروست دەکرێت توانای لەخۆگرتنی زیاتر لە 40 هەزار تۆن گەنمی هەیە، سەرجەم تایبەمەندییەکانی سایلۆی تێدایە کارئاسانی تەواو بۆ جووتیاران دەکات.

 

ئەمەش بزانە: جگە لە کۆیە چوار سایلۆی دیکە، لە دهۆک، زاخۆ، کفری و هەریر ڕەزامەندی دروستکردنیان هەیە و لە ماوەی داهاتوو جێبەجێ دەکرێن.