پڕۆژەیەکی گەورەی ئاو لە کۆیە جێبەجێ دەكرێت

ئاڤا نیوز

بەمەبەستی چارەسەرکردنی کێشەی ئاوی کۆیە و چەند گوندێکی دەوروبەری، سەرۆکوەزیران مەسرور بارزانی ڕەزامەندیی دا لەسەر جێبەجێکردنی پڕۆژەیەکی گەورەی ئاو لەو قەزایە.

وێنە گەورەکە: کابینەی نۆیەمی حکموەتی هەرێمی کوردستان بە پلان و پڕۆژەی ستراتیژی کاری لەسەر چارەسەر کردنی ڕیشەیی کێشەی ئاوی خواردنەوە کردووە، لەو چوارچێوەیەشدا، ژمارەیەک پڕۆژەی گەورەی ئاو جێبەجێ کراون، بەشێکیان تەواو کراون و ئەوانی دیکەش لە جێبەجێ کردنن، هەموو ئەو پڕۆژانەش پشت بە ئاوی سەرزەوی دەبستن.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای گوت: سەرۆکوەزیران مەسرور بارزانی، ڕەزامەندیی دا لەسەر جێبەجێ کردنی پڕۆژەیەکی ئاوی خواردنەوە بۆ قەزای کۆیە، بە توانای سێ هەزار مەتر سێجا ئاو لە کاتژمێرێکدا.

زانیاریی زیاتر: پڕۆژەکە بە 112 ملیار دینار جێبەجێ دەکرێت و پێکهاتووە لە پڕۆژەی ئاو و هێڵی گواستنەوە و وێستگەی ناوەندی، پڕۆژەکەش بە تۆڕی ئاوی کۆیە دەبەسترێتەوە و کێشەی ئاوی کۆیە و چەند گوندێکی دەوروبەری چارەسەر دەکات.

لەلایەکی دیکەوە: بە بڕیاری سەرۆکوەزیران، مەسرور بارزانی، سایلۆیەک بۆ جووتیارانی سنووری کۆیە و تەقتەق دروست دەکرێت و لە چەند ڕۆژی داهاتوو بەردی بناغەی دادەنرێت و توانای لەخۆگرتنی زیاتر لە 40 هەزار تۆن گەنمی هەیە.