هەولێر بە بردنەوەی لە نەورۆز هاتە پێشەنگی ڕیزبەندی

ئاڤا نیوز

هەولێر بە بردنەوەی لە نەورۆز، پێنجەم سەرکەوتنی لەم وەرزەی خولی ئەستێرەکانی عێراق تۆمار کرد و بە شێوەیەکی کاتی جیاوازی خاڵەکانی لەگەڵ دیالە بۆ سێ خاڵ بەرز کردەوە و بە تەنیا پێشەنگی گرت.

چیرۆكی سەرەكی: ئەمشەو لەمیانی یارییەكانی جەولەی شەشەمی خولی ئەستێرەكانی عێراق و لە دێربیی كوردستان، لەسەر یاریگە قەشەنگەكەی لە شاری سلێمانی، نەورۆز میوانداریی هەولێری كرد و جەماوەرێكی زۆری وەرزشدۆستیش لە هەوادارانی هەردوو یانە لە یارییەكە ئامادە بوون.

چی ڕوویدا: وەك ئەوەی پێشبینی دەكرا، یارییەكە لە ئاستێكی بەرزی هونەری و بە گەرموگوڕییەوە بەڕێوەچوو، بەڵام ئەنجامی یارییەكە پێچەوانەی گەرموگوڕیی یارییەكە، تا خولەكی 81 بە ساردی مایەوە، تا ئەوەی زولفیقار یونس، تۆڕی گۆڵی نەورۆزی برینداری هەژاند و بەم تاكە گۆڵە، هەولێری كردە خاوەنی سێ خاڵی یارییەكە.

ئەوەی پێویستە بیزانیت: هەولێر بە پێنج بردنەوەی لە شەش یاریدا، پێشەنگی یانەكانی خولی ئەستێرەكانی عێراقی گرتووە بە كۆكردنەوەی 16 خاڵ بە جیاوازی سێ خاڵ لەگەڵ نزیكترین ڕكابەری كە یانەی دیالەیە، نەورۆزیش تا دێت برینەكانی قووڵتر دەبن، بە كۆكردنەوەی تەنیا شەش خاڵ لە پلەی 18ـەمینی یانەكان دەبینرێت.