قوتابیێكی بەهرەمەندی دهۆك بیرۆكەیەكی ناوازە دادەهێنێت

ئاڤا نیوز

قوتابییەکی زانكۆی دهۆک پرۆژەیەكی ناوازەی داهێناوە كە لەڕێگەی ئەو پرۆژەوە، ئاوی بەكارهێنراو لە شووشتنگەی ئۆتۆمبێل، پاک دەكرێتەوە و دووبارە سوودی لێ وەردەگیرێتەوە، لایەنی حكومیی پارێزگاكەش، پرۆژەكەی وەك بیرۆكەیەكی بەسوود وەسف دەكەن و لەڕێگەی ئاڤاوە داوا دەكەن ئەو گەنجە سەردانیان بكات و كار لەسەر پرۆژەیەكی هاوبەش بكەن.

چیرۆكی سەرەكی: مەتین ئەمین، كوردی ئێزدییە و خوێندكاری كۆلێژی زانستە لە زانكۆی دهۆك، پرۆژەیەكی گەڵاڵە كردووە بۆ دووبارە ڕیسایكلینكردنەوەی ئاوی بەكارهاتوو لە شووشتنگەكانی ئۆتۆمبێل، لەپێناو دووبارە سوودوەرگرتن لە ئاوەكە تەنانەت ئەگەر بۆ پرۆژەی ئاودێری و كشتوكاڵیش بێت.

ئەوەی پێویستە بیزانیت: لە دهۆك 50 شوێنی شووشتنی ئۆتۆمبێل هەن كە مەزەندە دەكرێت ڕۆژانە 600 هەزار لیتر ئاو بۆ شووشتنی ئۆتۆمبێل خەرج بكرێت.

زانیاریی پەیامنێر: ڕۆژهات لوقمان، پەیامنێرمان لە شاری دهۆك قسەی لەگەڵ مەتین ئەمین، قوتابیی زانكۆ كردووە و لەبارەی بیرۆكەكەی دەڵێت، ماوەیەك پێش ئێستا ئەم بیرۆكەم لەلا دروستبوو، كاری وردم لەسەركرد و ئێستاش دەتوانم پرۆژەكە لە ئەرزی واقیعدا بەكردەیی بكەم، وتیشی ئەگەر لایەنی پەیوەندیداری حكومی هاوكاریم بكەن، دەتوانم پرۆژەكە فراوان بكەم و بۆ سوودی گشتی بەكاری بهێنم.

لەلایەكی دیكەوە: یونس جانۆ، بەڕێوەبەری گشتیی ئاو و ئاوەڕۆی دهۆك بە ئاڤای گوت، بەڕێوەبەرایەتییەكەمان هەمان پرۆژەی خستووەتە پلانیەوە و لە ئاییندەیەكی نزیكدا كار بۆ جێبەجێكردنی پرۆژەیەك دەكەین كە ئاوی شووشتنگەكان خاوێن دەكاتەوە و دەكرێت دووبارە سوودی لێ وەربگیرێتەوە.

لەڕێگەی ئاڤاوە داوا لەو گەنجە دەكات سەردانیان بكات و بیرۆكەكەی لەگەڵ پرۆژەكەیان تێكەڵ بكات بۆ ئەوەی بیخەینە خزمەتیی هاونیشتمانیانی دهۆك.