جارێکی دیکە خانەوادەی ئۆجەلان سەردانی ئیمرالییان کردەوە

ئاڤا نیوز

دوای دەستپێکردنی پرۆسەی ئاشتی لە تورکیا، چەند جارێکە خانەوادەی عەبدوڵڵا ئۆجەلان، ڕێبەری زیندانیکراوی پەکەکە لە زیندانی ئیمرالی سەردانی دەکەن.

وێنە گەورەکە: لە سەرەتای ئەمساڵەوە پرۆسەیەک بۆ وەستانی شەڕ لەنێوان گەریلاکانی پەکەکە و سوپای تورکیا دەستیپێکردووە، تورکیا ناوی لێناوە "تورکیای بێ تیرۆر" و پەکەکەش ناوی لێناوە "پرۆسەی ئاشتی و دیموکراتیک". لەم ماوەیە چەند جارێک خانەوادەکەی سەردانی عەبدوڵڵا ئۆجەلانیان کردووە.

لێدوانی فەرمی: محەممەد ئۆجەلان، برای عەبدوڵڵا ئۆجەلان بە ئاڤا میدیای وت، ئەمڕۆ هەینی عومەری کوڕم و فاتیمەی خوشکم و منداڵێکی بەیەکەوە چوونەتە سەردانی ئۆجەلان لە زیندانی ئیمرالی. تەندروستی ئەو زۆرباشە.

لەبارەی هەبوونی پەیامی فەرمی عەبدوڵڵا ئۆجەلان بۆ پرۆسەی ئاشتی و دواین گۆڕانکارییەکان، محەممەد ئۆجەلان دەڵێت: هەر پەیامێکی فەرمی ئۆجەلان هەبێت لە ماوەیەکی کەمدا عومەری برامان ڕایدەگەیەنێت.

باکگراوند: مانگی شوباتی ئەمساڵ عەبدوڵڵا ئۆجەلان پەیامێکی بڵاوکردەوە و داوای کرد پەکەکە کۆنگرەی خۆهەڵوەشاندنەوەی ببەستێت. ڕۆژانی  5 بۆ 7ـی مانگی پێنجی ئەمساڵ، پەکەکە کۆنگرەی خۆهەڵوەشاندنەوەی بەست و بڕیاریدا سەرجەم ڕێکخستنەکان هەڵوەشێنێتەوە. دواتر ڕۆژی 11-7-2025 گرووپێکی گەریلا لەبەردەم ڕاگەیاندنەکان چەکەکانیان سووتاند و ڕۆژی 26ـی ئەم مانگەش پەکەکە ڕایگەیاند گەریلاکانیان لە باکووری کوردستان و تورکیا کشاونەتەوە. لەبەرامبەردا پەرلەمانی تورکیا کۆمسیۆنێکی بۆ ئاشتی پێکهێناوە.