بەمزووانە 25 کۆچبەری دیکە لە لیبیاوە دەگەڕێنرێنەوە هەرێمی کوردستان

ئاڤا نیوز

بەوتەی باڵیۆزی عێراق لە لیبیا کە بۆ ئاڤا قسەیکردووە، ئامادەکارییان کردووە بۆ گەڕاندنەوەی 25 کۆچبەری خەڵکی هەرێمی کوردستان کە لە زیندانەکانی ئەو وڵاتە ماونەتەوە.

چیرۆکی سەرەکی: دوای ئەوەی لە چەند هەفتەی ڕابردوودا 40 کۆچبەری دیکە لە لیبیاوە گەڕێنرانەوە هەرێمی کوردستان، باڵیۆزی عێراق بەدواداچوونی کردبوو، ژمارەیەک کۆچبەری دیکە لە زیندانەکانی ئەو وڵاتە ماون و خەڵکی ناوچە جیاوازەکانی هەرێمی کوردستانن.

لێدوانی فەرمی: ئەحمەد سەحاف، کاربەڕێکەری باڵیۆزخانەی عێراق لە لیبیا بە ئاڤا میدیای گوت: باڵیۆزخانە هەموو ڕێکارەکانی گەڕانەوەی ئەو کۆچبەرانەی جێبەجێ کردووە، بەڵام گەڕانەوەیان ئارەزوومەندانەیە، ئەوانەی دەیانەوێت دەگەڕێنرێنەوە و هێشتا هیچ کاتێکیش بۆ گەڕانەوەیان دیاری نەکراوە.

ئەحمەد سەحاف دەشڵێت: باڵیۆزخانە بە بەردەوامی سەردانیان دەکات و توانیویەتی پەیوەندی تەلەفۆنی لەگەڵ کەسوکاریان لە هەرێمی کوردستان بڕەخسێنێت.

ئەوەی پێویستە بیزانیت: ماوەیەکە بەشێک لەوانەی دەیانەوێت بگەن بە ئەوروپا ڕێگای لیبیا بەکاردەهێنن، بەڵام بە یەکێک لە ڕێگا مەترسیدارەکان دادەنرێت و بەشێکی زۆریان دەستگیر دەکرێن و ڕووبەڕووی ئازاردانی زۆر دەبنەوە.