سەرۆك بارزانی: خەڵکی زاخۆ شایستەی ئەو خزمەتەن کە بۆیان کراوە

ئاڤا نیوز

ئێوارەی ئەمڕۆ 31ـی تشرینی یەکەمی 2025، سەرۆك مەسعود بارزانی سەردانی چەند شوێنێکی کولتووری زاخۆی کرد لەوانە، بازاڕی کۆنی زاخۆ، قشڵەی زاخۆی کۆن و کۆڕنیشی زاخۆ. سەرۆک بارزانی وتویەتی، "خەڵکی زاخۆ شایستەی ئەو خزمەتەن کە بۆیان کراوە".

وێنە گەورەكە: قشڵەی زاخۆ خاوەنی مێژووێكی دێرینی هەیە و بونیادنانی دەگەڕێتەوە بۆ پێش هەزار و 120ساڵ، ئەم شوێنە لە سەردەمی ڕژێمی بەعسی ڕووخاو، بۆ ئەشکەنجەدان و ئازاردانی هاووڵاتیانی سڤیل بەکار دەهات، ئێستاش حکوومەتی هەرێمی کوردستان بە شێوازی کولتووریی نۆژەنی کردووەتەوە و بووەتە شوێنێکی گەشتیاری و هەزاران کەس بۆ بینینی سەردانی زاخۆ دەکەن.

بڵاوكراوەی فەرمی: بارەگای بارزانی لەبارەی بەسەركردنەوەكەی سەرۆك مەسعود بارزانی بۆ ئەو بازاڕە، لە ڕاگەیێنراوێكدا ئاماژەی بەوە كردووە، سەرۆك بارزانی خۆشحاڵیی خۆی بە جوانی و ئاوەدانیی زاخۆ دەربڕی و وتوویەتی "خەڵكی زاخۆ شایەنی ئەم خزمەتەن کە بۆیان کراوە.

لەبەشێکی دیکەی ڕاگەیێنراوەکەی بارەگای بارزانی هاتووە، سەرۆك بارزانی سەردانی گوندی سپی کردووە و دیمەنی زاخۆی لە بەرزاییەکانەوە بینی و هەروەها چاوی بە ژمارەیەک هاووڵاتی کەوت کە سەردانی زاخۆیان کردووە و وێنەی لەگەڵ بەشێک لە هاووڵاتیان گرت.