دەیان كۆچبەری كورد لە دوورگەیەكی یۆنان داوای هاوكاری دەكەن

ئاڤا نیوز

دەیان کۆچبەری کورد، زیاتر لە بیست و چوار کاتژمێرە، لە دوورگەیەکی سەر بە یۆنان گیریان خواردووە و نان و ئاویان لێ بڕاوە، لە نێویشیاندا ژن و منداڵ هەن.

چیرۆکی سەرەکی: نزیكەی 30 کۆچبەری کورد کە لە تورکیاوە بەڕێکەوتوون، بەر لە گەیشتن بە كەناراوەكانی یۆنان، لە شەوی ڕابردووەوە لە دوورگەی ڕۆدۆس، لەلایەن كاپتنی بەلەمەكەیان فڕێدراون، و داوای هاوکاری و بەدەنگەوەچوون دەکەن.

زانیاریی بەدەستهاتوو: کۆچبەرە کوردەکان پەیوەندییان بە کەسوکاریان و ژمارەیەک چالاکوانی مافی پەنابەران لە ئەوروپا کردووە و پێیان ڕاگەیاندوون، دوای تێپەڕبوونی شەو و ڕۆژێک بەسەر مانەوەیان لە دوورگەکە، تاکو ئێستا هیچ کەس و لایەنێک بە هانایانەوە نەچووە.

لێدوانی فەرمی: ڕەنج پشدەری چالاكوانی بواری مافەكانی پەنابەران، تایبەت بە ئاڤا ڕایگەیاند، بەپێی وتەی کۆچبەرەکان ژمارەیان 30 کەسە و لەنێویاندا دوو خانەوادە هەن كە سێ منداڵیشیان لەگەڵدایە، لە شەوی ڕابردووەوە، كاپتنی بەلەمەكەیان بەهۆی ترسی دەستگیركردن لەلایەن پۆلیسی كەناراوەكانی یۆنان، لەو دوورگەیە فڕێیداون و بەجێیهێشتوون، بەهۆی زۆر مانەوەیان لە دوورگەکە، نان و ئاویان لەلا نەماوە و داوای یارمەتی و بەدەنگەوەهاتن دەکەن.

زانیاریی زیاتر: كۆچبەرە كوردەكان، زۆربەیان خەڵكی ڕۆژهەڵاتی كوردستانن و ژمارەیەكیش، هاونیشتمانیی شارۆچكەی قەڵادزێ و ڕانیەن و دوو گەنجیش دانیشتووی هەولێر و كەركووكن.