وەزارەتی پەروەردەی عێراق: سەرکردەکانی داعش تائێستا مووچە لە پەروەردەی ئەنبار وەردەگرن

ئاڤا نیوز

 

بەهۆی خەرجکردنی مووچە بۆ سەرکردەکانی داعش، وەزارەتی پەروەردەی عيراق "سزای سەرزەنشتکردن" بەسەر بەڕێوەبەری گشتیی پەروەردەی ئەنبار دەسەپێنێت.

 

چیرۆکی سەرەکی: بەپێی بەڵگەنامەیەک کە دەست ئاڤا میدیا کەوتووە و لەلایەن وەزارەتی پەروەردەوەی عێراقەوە دەرچووە و واژۆی ئیبراهيم نامس جبووری لەسەرە، تێیدا سزای سەرزەنشتکردنی بەسەر نافع دلێمی، بەڕێوەبەری گشتیی پەروەردەی ئەنبار کە سەر بە پارتەکەی حەلبووسییە، سەپاندووە.

 

ئه‌وه‌ی له‌باره‌یه‌وه‌ دەگوترێت: بەگوێرەی بەڵگەنامەکەی وەزارەتی پەروەردەی عێراق، فەرمانی سزاکەی سەر نافع دلێمی، بەهۆی خەرجکردنی مووچە بۆ چەند سەرکردەیەکی دیاری ڕێکخراوی داعش بووە.

 

ئەمەش بزانە: ئەم بڕیارە لە کاتێکدایە کە حەلبووسی، سەرۆکی حزبی تەقەدوم، وەزیری پەروەردەی بە گەندەڵی و بەهەدەردانی 21 ملیار دینار و چەندین پێشێلکاری دارایی و کارگێڕی دیکە تۆمەتبار کردبوو.