ئومێد خۆشناو: ئەو بابەتەی لە هەولێر ڕوویدا بەرنامە بۆداڕێژراو نەبوو

ئاڤا نیوز

پارێزگاری هەولێر ڕایدەگەیێنێت، ئەمڕۆ بەرپرسی مەڵبەندی سێی یەكێتی لە هەولێر تەلەفۆنی بۆ كردووم و جەختمان لەوە كردەوە، ئەوەی لە سەنتەری هەولێر ڕوویدا، بابەتێکی نەرێنی بوو، بەڵام بابەتێكی ڕێكخراو و بەرنامە بۆداڕێژراو نەبوو.

چیرۆكی سەرەكی: ڕۆژی پێنجشەممەی ڕابردوو 30ـی ئۆكتۆبەری 2025، گرژی و ئاڵۆزی لەنێوان ژمارەیەك لایەنگری پارتی و یەكێتی لە سەنتەری شاری هەولێر دروستبوو، كاتێك كۆمەڵێك گەنج خۆڕسكانە سەرقاڵی بانگەشەی هەڵبژاردن بوون، و بە كتوپڕی شەڕ و ئاڵۆزی لەنێوانیان ڕوویدا.

لێدوانی فەرمی: ئومێد خۆشناو، پارێزگاری هەولێر لە كۆنفرانسێكی ڕۆژنامەوانیدا ڕایگەیاند، بەرپرسی مەڵبەندی سێی یەكێتی لە هەولێر تەلەفۆنی بۆ كردووم و جەختمان لەوە كردەوە، ئەوەی لە سەنتەری هەولێر ڕوویدا، حاڵەتێكی نەرێنی بوو، بەڵام بابەتێكی ڕێكخراو و بەرنامەبۆداڕێژراو نەبوو.

ڕاشیگەیاند، هیچ لایەنێك سكاڵای لەسەر ئەو ڕووداوە تۆمار نەكردووە، سەرەڕای ئەوەش؛ لیژنەی باڵای ئەمنیی پارێزگای هەولێر لە چوارچێوەی ڕێنماییەكانی كۆمیسیۆن، ڕێكاریی پێویستمان گرتووەتە بەر. دووپاتی دەكەینەوە فەزای بانگەشەكردن بۆ سەرجەم پارت و لایەنە سیاسییەكانی بەشدار لە هەڵبژاردن لە سنووری پارێزگای هەولێر، یەكسان دەبێت و بۆ هەمووان وەك یەكە.

ئومێد خۆشناو ئاماژەی بەوەشكرد، شارێكی گەورەی وەكو هەولێر، ئەگەری ڕوودانی حاڵەتێكی لەمجۆرەی لێ چاوەڕوان دەكرێت كە خۆزگە ڕووی نەدابووایە. 

گوتیشی: بابەتێكی ڕێكخراو و بەرنامەبۆداڕێژراو نەبوو نە لەلایەن یەكێتی و نە لەلایەن پارتییەوە، بەڵكو كۆمەڵێك گەنجی لایەنگری هەردوو حیزب، خۆڕسكانە سەرقاڵی بانگەشەی هەڵبژاردن بوون، و بە كتوپڕی شەڕ و ئاڵۆزی لەنێوانیان ڕوویدا.