مەزڵووم عەبدی: كۆبانێ سەرەتای ڕزگاركردنی ناوچەكە بوو لە دەستی داعش

ئاڤا نیوز

فەرماندەی گشتیی هێزەكانی سووریای دیموكرات بەبۆنەی ڕۆژی جیهانیی كۆبانێ، پەیامێكی بڵاوكردووەتەوە و ڕایدەگەیێنێت، بە پشتیووانیی هاوپەیمانەكانمان، گەل و هێزەكانمان توانییان ئەم ڕێكخراوە تیرۆرستییە تێكبشكێنن كە هەڕەشە بوو بۆ سەر هەموو جیهان.

وێنە گەورەكە: ڕۆژی یەكی تشرینی دووەم، وەك ڕۆژی جیهانیی كۆبانێ دیاریكراوە، ئەو شارە کوردییەی ڕۆژئاوای كوردستان كە بووە قەڵای بەرخۆدان لە بەرامبەر تیرۆرستانی داعش و سیمبولی نەبەزین لە جیهاندا، كاتێك گەل و شەڕڤانان بۆ هاوكاری پێشمەرگەی كوردستان و هێزەكانی هاوپەیمانیی نێودەوڵەتیی بۆ ماوەی 134 ڕۆژ، بەرگرییان لە كۆبانێ كرد و بەرەنگاری چەكدارانی داعش بوونەوە كە ئەوكات گەورەترین ڕێكخراوی تیرۆرستی بوو لەسەر ئاستی جیهان.

پەیامی فەرمی: مەزڵووم عەبدی، فەرماندەی گشتیی هێزەكانی سووریای دیموكرات هەسەدە، لە ئەژماری فەرمیی خۆی لە تۆڕی كۆمەڵایەتیی ئێكس پەیامێكی بڵاوكردووەتەوە و دەڵێت، گەل و شەڕڤانان بەرخۆدانێکی باوەڕپێنەکراویان بۆ بەرگریکردن لە کۆبانێ نیشان دا، لەم ساڵیادەدا، هەوڵ و قوربانییەكانی خەڵک و شەڕڤانان بۆ کۆبانێ و هەموو مرۆڤایەتی لە دژی چەتەکانی داعش بە شكۆوە یاد دەكەینەوە، هاوكات پشتیووانی و پاڵپشتیی هاوپەیمانی نێودەوڵەتیی لەبیرناكەین.


فەرماندەی گشتیی هەسەدە ئاماژەی بەوەشكردووە، پشتیوانیی جیهانی، ڕێگەی بە گەل و هێزەکانمان دا؛ ئەم ڕێکخراوە تیرۆریستییەی کە هەڕەشە بوو بۆ سەر هەموو جیهان، لە کۆبانێ تێکشکێنین، و کۆبانێ سەرەتای ڕزگارکردنی ناوچەکە بوو لە تیرۆری داعش.

پەیوەست بەم بابەتە: ئەوكاته‌ی شاری كۆبانێ لەژێر هێرشی چڕی داعش بوو و مەترسیی کەوتنی لێ دەكرا، له‌سه‌ر داوای سه‌رۆک بارزانی و بە بڕیاری پەرلەمانی كوردستان، یەكەم كاروانی هێزەكانی پێشمەرگەی كوردستان له‌ ڕۆژى 28ى ئۆكتۆبەری ساڵى 2014، گه‌يشتنه‌ كۆبانێ، گەیشتنی هێزی پێشمەرگە، هاوکێشەی هێزی گۆڕی و توانرا بە ماوەیەکی کورت مەترسییەکانی سەر ئەو شارە کەم بکرێتەوە و کۆبانێش ڕزگار بکرێت.