مینحەی مانگی 10 بەسەر هاونیشتمانیانی ئێزدیی ڕزگاربووی دەستی داعش دابەش دەكرێت

ئاڤا نیوز

وا بڕیارە لە ڕۆژانی 4 تاوەكوو 7ـی ئەم مانگە، مینحەی مانگی 10 بەسەر هاونیشتمانیانی ئێزدیی ڕزگاربووی دەستی داعش دابەش بكرێت.

چیرۆکی سەرەکی: ئەمڕۆ شەممە 01-11-2025، بنكەی ڕۆشنبیری و كۆمەڵایەتیی لالش، خشتەی دابەشكردنی پێشینەی مانگی تشرینی یەكەمی بۆ ڕزگاربووانی دەستی داعش ڕاگەیاند كە پێشینەی چواردەیەمینە پێیان دەدرێت.

لێدوانی فەرمی: سەعید جەردۆ، سەرۆکی بنكەی ڕۆشنبیری و كۆمەڵایەتیی لالش بە ئاڤا میدیای ڕاگەیاند، دابەشكردنی مینحەكە لە ڕۆژی سێشەممەوە 4ـی تشرینی دووەم دەستپێدەكات و تاوەكو ڕۆژی هەینی 7ـی تشرینی دووەم بەردەوام دەبێت، سوودمەندان دەتوانن لە سەرجەم نووسینگەكانی بنكەی لالش لە شێخان، كۆمەڵگەی شاریا، ناوچەی خانكێ و كۆمەڵگەی دێرەبوون و بنكەی سەرەكی لالش، پاداشتەكانیان وەربگرن بەپێی ئەم خشتەیەی خوارەوە:

٠ قەزای شێخان، هۆڵی لالش - سێشەممە 4-11-2025
٠ كۆمەڵگەی شاریا، هۆڵی لالش - چوارشەممە 5-11-2025.
٠ كۆمەڵگەی دێرەبوون، هۆڵی لالش - پێنجشەممە 6-11-2025
٠ ناحیەی خانكێ، قەسرێزدین - هەینی 7-11-2025

ئەوەی پێویستە بیزانیت: ڕۆژی 02-07-2024، بە ئامادەبوونی سەرۆکوەزیران مەسرور بارزانی، بەرنامەی پاڵپشتی دارایی بۆ ڕزگاربووانی دەستی داعش ڕاگەیێنرا، سێ هەزار و 590 ڕزگاربووی دەستی داعش ئەم مینحەیە دەیانگرێتەوە. لەو ژمارەیە دوو هەزار و 500 کەس مانگی ڕابردوو مینحەکەیان وەرگرتووە. بەوتەی سەعید جەردۆ، بۆیە هەموو ڕزگاربووان مینحەکە وەرناگرن، چونکە بەشێکیان ناویان هەیە و لە ئەوروپا و ڕۆژئاوا دەژین و ناتوانن مانگانە مینحەکە وەرگرن.

بۆچی گرنگە: سەرۆكوەزیران مەسرور بارزانی، لە سۆنگەی باشتركردنی دۆخی ژیانی هاونیشتمانیانی ئێزدی بەتایبەت ئەو ڕزگاربووانەی لەوەتەی ساڵی 2014 لەلایەن تیرۆرستانی داعش ڕفێندرابوون، بڕیاریدا بە تەرخانكردنی مینحەی مانگانە بۆیان، بەڵێنیشی داوە لەگەڵ باشتربوونی دۆخی ئابووریی هەرێمی کوردستان، مینحەکە باشتر دەبێت و پرۆژە و خزمەتگوزاریی زیاتر پێشکەشی ڕزگاربووانی ئێزدیی دەكرێت.