بەغدا مووچەی مانگی چوار هاوشێوەی مانگەکانی ڕابردوو بەشێوەی لیست دەنێرێت

ئاڤا نیوز

 

ئەندامێکی لیژنەی دارایی ئەنجوومەنی نوێنەرانی عێراق ئاماژە بەوە دەدات، ناردنی پارە بۆ مووچەی مووچەخۆرانی هەرێمی کوردستان هاوشێوەی مانگەکانی ڕابردوو بەپێی لیستی وەزارەتی دارایی هەرێمی کوردستان دەنێرێت.

 

وێنە گەورەکە: وەزارەتی دارایی و ئابووریی هەرێمی کوردستان ڕێکارەکانی ئامادەکاردنی لیستی مووچەی مانگی چواری دەستپێکردووە، پێشبینی دەکرێت لەگەڵ دابەشکردنی مووچەی فەرمانبەرانی عێراق پارەکەی هەرێمی کوردستانیش بنێردرێت.

 

لێدوانی فەرمی: "تاوەکو بابەتی بە دیجیتاڵکردنی مووچە یەکلایی دەبێتەوە، وەزارەتی دارایی عێراق بەردەوام دەبێت لە ناردنی مووچەی مووچەخۆران، بە گوێرەی ئەو لیستانەی لەلایەن وەزارەتی دارایی هەرێمی کوردستانەوە دەنێردرێت."
د.نەرمین مەعرووف، ئەندامی لیژنەی دارایی لە ئەنجوومەنی نوێنەرانی عێراق وای بە ئاڤا نیوز گوت.

ئەوەی پێشبینی دەکرێت: چاوەڕوان دەکرێت لەدوای 18 مانگ ڕێکارەکانی ناردنی پارە لە بەغدا دەستپێبکات و پارەکەی هەرێمی کوردستانیش بخرێتە سەر هەژماری بانکیی وەزارەتی دارایی.

 

باکگراوند: وەزارەتی دارایی عێراق پێشتر بڕیاری دا مووچەی مانگی ئادار دەبێت بەشێوەی ئەلیکترۆنی بێت، ئەو مووچەخۆرانەشی کارتی بانکییان نییە، بە کاش مووچە وەردەگرن، بەڵام بۆ مانگی نیسان دەبێت هەموو مووچەخۆرێک کارتی بانکیی هەبێت.