ترەمپ: سەرۆکی سووریا کارێکی باش دەکات و ڕەنگە سەردانی کۆشکی سپی بکات

ئاڤا نیوز

سەرۆکی ئەمریکا، ستایشی "کارە باشەکانی" ئەحمەد شەرع، سەرۆکی سووریا دەکات لە بەڕێوەبردنی وڵات و ئامادەیی نیشاندا بۆ پێشوازیکردن لێی لە کۆشکی سپی. ترەمپ ڕاشیگەیاند، ئەمریکا سزاکانی سەر سووریای هەڵگرتووە بۆ ئەوەی دەرفەتێکی پێبدرێت، و شەرعیش کارێکی باش دەکات.

بۆچی گرنگە؟: ئەمە یەکەمین سەردانی سەرۆکی سووریایە بۆ کۆشکی سپی لە ماوەی زیاتر لە 70 ساڵدا، کە وەک خاڵێکی وەرچەرخان لە پەیوەندییەکانی نێوان دیمەشق و واشنتۆن سەیر دەکرێت.

چی ڕوویدا؟: ترەمپ ئەمڕۆ دووشەممە لەسەر فڕۆکەی سەرۆکایەتیی بە ڕۆژنامەنووسانی ڕاگەیاند، "سزاکانمان لەسەر سووریا لابرد بۆ ئەوەی دەرفەتێکی پێبدرێت، بیستوومە سەرۆکەکەی کارێکی زۆر باش دەکات." ئاماژەی بەوەشدا "سەرۆکی سووریا ڕەنگە بەم زووانە سەردانی واشنتۆن بکات."

ئەوەی لەوبارەیەوە دەگوترێت: ڕۆژنامەی "نیویۆرک تایمز" ئاشکرای کرد کۆبوونەوەکە لە 10ی ئەم مانگە دەبێت و "پۆلیتیکۆ"ش گواستییەوە کە ترەمپ هەینی داهاتوو پێشوازی لە شەڕع دەکات.

لەلایەکی دیکەوە: ئەسعەد شەیبانی، وەزیری دەرەوەی سووریا، دوێنێ یەکشەممە ڕایگەیاند، شەڕع بەم زووانە سەردانێکی فەرمی بۆ کۆشکی سپی ئەنجام دەدات.