ئەنجوومەنی وەزیرانی کوردستان کێشەی توێژێکی خانەنشینان چارەسەر دەکات

ئاڤا نیوز

بەر لەوەی یاسای خانەنشینی هەرێمی کوردستان هاوتای عێراق بکرێت، بەشێکی فەرمانبەران بەشێوەیەکی ئارەزوومەندانە لە تەمەنی 45 ساڵی بۆ سەرەوە داوای خانەنشینیان پێشکەش کرد و مامەڵەکانیان ڕاگیرا، ئێستا بە بڕیاری ئەنجوومەنی وەزیرانی کوردستان خانەنشین دەکرێن.

چیرۆکی سەرەکی: پێش بەرواری 01-07-2024 ژمارەیەک فەرمانبەر کە تەمەنیان گەیشتبووە 45 ساڵ و 15 ساڵ خزمەتیان هەبوو، داوای خانەنشینبوونیان کرد، بەپێی یاسای ژمارە 27ـی ساڵی 2006 و یاسای چاسکازی مامەڵەی خانەنشینان دەستپێکرد، بەڵام لە نیوەی کارەکانی وەستێنرا، بەهۆی ئەوەی یاسای نوێی خانەنشینی ڕێگە بە خانەنشینبوونیان نادات، بەمەش 16 مانگە نە مووچەی فەرمانبەرییان وەرگرتووە، نە مووچەی خانەنشینییان بۆ بەستراوە.

ئێستا خانەنشینانی هەرێمی کوردستان بەگوێرەی یاسای ژمارە 9ـی ساڵی 2014 خانەشین دەکرێن، بەمەش هەر فەرمانبەرێک بیەوێت خانەنشین بێت بە ئارەزوومەندانە، دەبێت تەمەنی 50 ساڵ بێت و 15 ساڵ خزمەتی هەبێت، ئەم یاسایەش ڕێگە بەو فەرمانبەرانە نادات كە لە 45 ساڵی داوای خانەشنینی بکەن، بەشێکیان لە کۆتایی ساڵی ڕابردوو گەڕانەوە سەر وەزیفەیان.

لێدوانی فەرمی: سەرچاوەیەک لە بەڕێوەبەرایەتی گشتیی خانەنشینی هەرێمی کوردستان بە ئاڤای گوت، "بە بڕیاری ئەنجوومەنی وەزیرانی کوردستان، مامەڵەی ئەو خانەنشینانە تەواو دەکرێت، بەگوێرەی یاسا کۆنەکە خانەنشین دەکرێن، چونکە بە یاسا نوێیەكە ناتوانن خانەنشین بن."

گوتیشی، "بە ئەگەری زۆرەوە مووچەکانیان لەسەر داهاتی ناوخۆی هەرێمی کوردستان دابین دەکرێت، چونکە یاسای خانەنشینی عێراق نایانگرێتەوە و وەزارەتی دارایی عێراق ئامادە نییە مووچەکانیان دابین بکات و قەرەبووی 16 مانگی ڕابردوویان بکاتەوە."