مەسرور بارزانی: مووچەی کارمەندانی کەرتی تایبەت دەکەینە سیستەمی بانکی

ئاڤا نیوز

سەرۆکوەزیران مەسرور بارزانی هانی گەنجان دەدات ڕوو لە کەرتی تایبەت بکەن و پشت بە دامەزراندن لە حکومەت نەبەستن، بۆ ئەمەش چەند بەڵێنێکیان پێدەدات، ڕەخساندنی هەلی کاری یەکسان، سیستەمی بانکی بۆ دابەشکردنی مووچەی کارمەندانی کەرتی تایبەت، خانەنشینکردنیان و پاڵپشیکردنی پڕۆژەکانیان.

چیرۆکی سەرەکی: لەدوای ساڵی 2013 ەوە حکومەتی عێراق دامەزراندنی خەڵکی کوردستانی ڕاگرتووە، ئەمەش بووەتە هۆی بێکاربوونی دەیان هەزار دەرچووی زاکۆ و پەیمانگەکان، کابینەی نۆی حکومەتی کوردستان لە شەش ساڵی ڕابردوودا بەچڕی کاری لەسەر چارەسەرکردنی ئەم کێشەیە کردووە، بۆ ئەوەی گەنجان ڕوو لە کەرتی تایبەت بکەن.

چارەسەرکردنی ئەم کێشەیە بە قەبارەی گەورەتر و پلانی داهاتووی حکومەت بۆ گەنجان، بەشێک بوو لە قسەکانی مەسرور بارزانی، سەرۆکوەزیرانی کوردستان لەکاتی گفتوگۆکردنی لەگەڵ چەند گەنجێک لەدوای کردنەوەی پێشانگایەکی  تایبەت بە ئاشنابوون بە ناسنامەی کورد لەڕێگەی هونەری ڕەسەن و هاوچەرخەوە، کە لەلایەن دامەزراوەی کوردستان فاوەندەیشن ڕێکخرابوو.

لێدوانی فەرمی: پەیوەست بە دامەزراندن و بە ڕەخساندنی هەلی کار مەسرور بارزانی ڕایگەیاند، لە ساڵی 2013ەوە حکومەتی عێراق ڕێگەی نەداوە خەڵک لە هەرێمی کوردستان دابمەزرێت، ئەوەی کراوە تەنیا بە گرێبەست بووە، ئەمەش ڕێگرییەکی گەورە بووە خەڵک بتوانێت لە کەرتی گشتی دابمەزرێت.

 لە بەرامبەردا کەرتی تایبەت دەتوانێت ڕۆڵێکی گەورە لە ڕەخساندنی هەلی کار ببینێت، بۆیە لە چەند ساڵی ڕابردوودا 140 هەزار هەلی کارمان لە کەرتی تایبەت ڕەخساندووە.

پێویستە گەنجەکانی ئێمە ئاسوودە بن و دڵنیابن لەوەی، ئەگەر گەنجان حەزیان لە کارکردن بێت دەرفەتی یەکسانیان بۆ دەڕەخسێت، دەبێت وەکو کەرتی هەموو مافێکیان بۆ دەستەبەر بکرێت لەوانە خانەنشینکردنیان، ئەگەر کەرتی تایبەت گەرەنتی خانەنشینکردنی کارمەند بکات، خەڵکێکی زۆر ڕووی تێدەکات.

بابەتی ستراتیژی: سەرۆکوەزیرانی کوردستان باسی لەوە کرد بەشێک لە کارەکانی کەرتی تایبەتیان ڕێکخستووە،  لە ڕێگای "هەژماری من"یشەوە دەتوانرێت مووچەی کەرتی تایبەت ڕێکبخرێت.

بەڵێنیشی دا یەکێک لەو کارانەی لە ئایندە دەیکات ڕێکخستنی کەرتی تایبەتە، لەو چوارچێوەیە مووچەی کارمەندانی کەرتی تایبەت دەکەن سیستەمی بانکی، یەکێک لە سوودە گەورەکانیشی خانەنشینکردنی کارمەندانی کەرتی تایبەت دەبێت.

مەسرور بارزانی جەختی کردەوە حکومەتی کوردستان دەیەوێت ژێرخانێکی دروستی ئابووری هەبێت، ئەویش سیستەمی بانکییە بۆ ئەوەی هەر هاووڵاتییەک مافی ئەوەی هەبێت پارە لە بانک بە قەرز وەربگرێت و پرۆژەکانی پێ جێبەجێ بکات، دواتر بە قیست بیداتەوە.

گۆشەیەکی دیکە: سەرۆکوەزیران "پرۆژەی گەشانەوە"ی وەک نموونە هێنایەوە و گوتی، کاتێک کۆمەڵێک گەنج ویستیان بزنسی خۆیان هەبێت و فراوانی بکەن، ئێمە وەکو حکومەت یارمەتیمان دان، جگە لە کۆمەڵە گەنجەکە، ژمارەیەکی دیکەش لە گەنجان هاتنە ناو پرۆژەکە، ئێمە بەردەوام دەبین لە یارمەتیدانی ئەو گەنجانەی دەیانەوێت کاری خۆیان هەبێت. {حکومەتی کوردستان لەڕێگەی پڕۆژەی گەشانەوە هاوکاریی دارایی پێشکەش بەو گەنجانە دەکات پڕۆژەی بچووکیان هەیە".