پرۆژەی گەشانەوە دەستپێدەکات و قەرز دەدرێتە هاونیشتمانییان

ئاڤا نیوز

 

لەمساڵدا پڕۆژەی گەشانەوە دەستپێدەکات، بەڕێوەبەری پرۆژەکەش دەڵێت، "مەرجە ئەو کەسەی سودمەند دەبێت پڕۆژەکەی لە هەرێمی کوردستان بێت".

 

لێدوانی فەرمی: ئارام ئەنوەر، بەڕێوەبەری پڕۆژەی گەشانەوە لە هەرێمی کوردستان بە ئاڤا میدیای ڕاگەیاند: پڕۆژەی گەشانەوە لە کاتێکی نزیک و لەمساڵدا دەستپێدەکات، قەرز بە خاوەنی پڕۆژە بۆ فراوانکردنی پڕۆژەکەی دەدرێت.

 

زانیاریی تایبەت: مەرجی پێدانی قەرزەکە، دەبێت کەسەکە دانیشتووی هەرێمی کوردستان بێت، پڕۆژەکەی لە هەرێم بێت، پێویستی بە کەفیل نییە، تاوەکو تەمەنی 60 ساڵی قەرز دەدرێت، هەروەها هیچ زیادەیەکی نایەتە سەر.

 

ژمارەکان وادەڵێن: بڕی قەرزەکە بەگوێرەی پڕۆژەکە دیاری دەکرێت، زۆرترین بڕیش 150 ملیۆن دینار دەبێت.

 

لەلایەکی دیکەوە: ئارم ئەنوەر گوتیشی، بە بڕیاری ئەنجوومەنی وەزیران 100٪ لێخۆشبوون بۆ ئەو سودمەندانەی قەرزی بچووک دراوە، کە وەفاتیان کردووە و وارسەکانیان ناتوانن قەرزەکە بگەڕێننەوە.

 

ئەوەی پێویستە بیزانیت: ماوەی گەڕانەوەی قەرزی پڕۆژەی گەشانەوە سێ ساڵە، بەڵام لەگەڵ دەستپێکردنی پڕۆژەکەدا گۆڕانکاری بەسەر ئەو وادەیەدا دێت.

 

ئەمەش بزانە: پێشتر لەلایەن حکومەتی هەرێمی کوردستانەوە پڕۆژەی قەرزی بچووک هەبوو کە قەرزی بە هاونیشتمانییان دەدا بۆ دروستکردنی پرۆژە و ژماریەکی زۆر لە خەڵک سوودمەند بوون؛ ئێستا ناوی پرۆژەکە بۆ "پرۆژەی گەشانەوە" گۆڕاوە و تیایدا ئاسانکارییەکی زیاتر بۆ ئەو هاووڵاتییانە دەکات کە دەیانەوێت قەرز وەربگرن.