بەغدا 430 ملیار دینار بۆ مووچە دەخاتە سەر هەژماری بانکی هەرێمی کوردستان

ئاڤا نیوز

وەزارەتی دارایی عێراق بڕی 430 ملیار دیناری دیکەی بۆ مووچەی مانگی سێ خستە سەر هەژماری بانکی هەرێمی کوردستان.

چیرۆکی سەرەکی: لە کۆتایی هەفتەی ڕابردووەوە وەزارەتی دارایی عێراق دەستی بە ناردنی مووچەی مانگی سێ کردووە، وەزارەتی دارایی هەرێمی کوردستانیش لە دوێنێوە دەستی بە دابەشکردنی مووچە کردووە و بڕیارە تاوەکو جەژن سەرجەم مووچەخۆران وەری بگرن.

لێدوانی فەرمی: ئەمڕۆ وەزارەتی دارایی عێراق بڕی 430 ملیار دیناری دیکی خستە سەر  هەژماری بانکیی هەرێمی کوردستان و تا ئێستا بڕی 560 ملیاری ناردووە. مەولود سابیر، بەڕێوەبەری گشتیی بانکە بازرگانییەکان وای بە ئاڤا نیوز گوت.

ئەوەی پێویستە بیزانیت: بڕیارە ئەم مانگەش وەزارەتی دارایی عێراق هاوشێوەی مانگی ڕابردوو بڕی 952 ملیار دینار بۆ مووچە بنێرێت.

زانیاریی زیاتر: ڕێکارەکانی ناردنی مووچەی مانگی چوار لەدوای 18 ی مانگەوە دەستپێدەکەن.

وێنە گەورەکە: سەرۆکوەزیران بارزانی و سوودانی لەبارەی مووچە ڕێککەوتوون، بڕیارە لەمەودوا  بابەتی مووچە لە هەموو ناکۆکی و کۆت و بەندەکان بەدوور بگیرێت و لە کاتی خۆیدا بنێردرێت .