16 هەزار فەرمانبەری دیكە لە سنووری شارەوانییەكانی هەولێر زەوی وەردەگرن

ئاڤا نیوز

سبەی، نزیكەی 16 هەزار پارچەزەویی دیكە لە سنووری شارەوانییەكانی بنەسڵاوە، دارەتوو و كەسنەزان سەر بە شاری هەولێر دابەش دەكرێت، تیروپشك بۆ فەرمانبەرانی سوودمەندبوو دەكرێت.

وێنە گەورەکە: لەسەر ڕاسپاردەی سەرۆکوەزیران مەسرور بارزانی، بڕیاری دابەشکردنی زەوی بەسەر فەرمانبەران کەوتووەتە بواری جێبەجێکردنەوە، لە هەر شارەوانییەک زەوی ئامادەبێت تیروپشکیان بۆ دەکرێت و زەوییەکان بەسەر فەرمانبەرانی مەدەنی و سەربازی و خانەنشینان دابەش دەکرێت، هەر فەرمانبەرێک کارتی زانیاریی سەر بە چ سنوورێک بێت؛ لەو شوێنە زەوی پێ دەدرێت.

لێدوانی فەرمی: مەریوان حاكم هادی، بەڕێوەبەری گشتیی شارەوانیی هەولێر بە ئاڤای ڕاگەیاند، ئەو 16 هەزار پارچە زەوییەی دابەش دەكرێت كەوتووەتە سنووری شارەوانییەكانی دارەتوو و بنەسڵاوە و كەسنەزان و فەرمانبەرانی سنووری هەر سێ شارەوانییەكە بەپێی كارتی زانیارییان لەنزیكترین شوێنی نشتەجێبوونیان زەوییان پێدەدرێت.

باکگراوند: لە 27-05-2024 سەرۆکوەزیران مەسروور بارزانی، بڕیاری دا زەوی بەسەر فەرمانبەرانی كوردستان دابەش بكرێت كە لە رابردوودا سوودمەند نەبوون، قۆناغی یەكەمی پرۆسەكە لە زاخۆ و گەرمیانەوە دەستیپێكرد، دواتر هەولێر و سلێمانی گرتەوە.