ئاڤای خەڵک؛ دانیشتووانی گوندەکانی سەر ڕێگای کەورگۆسک نیگەرانن لە خراپی ڕێگاکەیان

ئاڤا نیوز

کاسبکاران و دانیشتووانی گوند و ناوچەکانی سەر رێگای کەورگۆسک لە هەولێر، بەهۆی خراپی و شێواوی ڕێگاکەیانەوە، ناڕەزایەتی دەردەبڕن و داوای چاککردنەوەی بەپەلەی دەکەن. 

چیرۆکی سەرەکی: خراپی رێگای گوند و ناوچەکانی سەر ڕێگای کەورگۆسک، بووەتە کێشەیەکی گەورە بۆ کاسبکاران و دانیشتووان. شۆفێران گلەیی ئەوە دەکەن کە بەهۆی چاڵ و چۆڵی و شێواوی ڕێگاکەوە، ناچارن مانگانە ئۆتۆمبێلەکانیان ببەنە لای وەستا بۆ چاککردنەوە، ئەمەش بارگرانییەکی دارایی زۆریان لەسەر دروست دەکات.

زانیاریی بەدەستهاتوو: دانیشتووانی ئەو ناوچانە نیگەرانی خۆیان سەبارەت بە مەترسییەکانی رێگاکە بۆ سەر ژیانیان دەردەبڕن، بە ئاڤایان وت، "هەموو رۆژێک چاوەڕوانکراوە تووشی رووداوی هاتووچۆ ببین بەهۆی ئەم رێگا خراپەوە."

لێدوانی فەرمی: عیماد محەممەدئەمین، بەڕێوەبەری چاککردنەوە و پاراستنی رێگاوبانی هەولێر، بە ئاڤای ڕاگەیاند، ئەم ڕێگایە وەک شوێنەکانی دیکە لە داهاتوودا دەکرێتە جووتساید، پڕۆژەیەکمان بۆ چاککردنەوەی ڕێگاکە هەیە و چاوەڕوانی تەرخانکردنی پارەین بۆ جێبەجێکردنی.

عیماد محەمەد ئەمین گوتیشی: "ئەوەی ئێستا بتوانین بە خێرایی بیکەین، بریتییە لە ڕنین و لابردنی قیرە شێواو و تێکچووەکەیە و چاککردنەوەیەتی بە شێوەیەکی کاتی، تاوەکو پڕۆژە گەورەکە جێبەجێ دەکرێت."