زیاتر لە دوو هەزار کەس لە دەنگدان بێبەش دەبن

ئاڤا نیوز

سزادراوان لە چاکسازییەکان ناتوانن بەشداری لە پرۆسەی دەنگدان بۆ خولی شەشەمی پەرلەمانی عێراق بکەن، بەهۆیەوە زیاتر لە دوو هەزار کەس لە هەرێمی کوردستان بێبەش دەبن.

وێنە گەورەکە: پڕۆسەی دەنگدانی تایبەت لە بەرەبەیانی ئەمڕۆ یەکشممەوە لە سەرجەم پارێزگاکانی عێراق بەردەوامە، بڕیارە دوو ڕۆژی دیکە پرۆسەی دەنگدانی گشتیی بەڕێوەبچێت، سەرجەم چین و توێژەکان و ئەوانە مافی دەنگدانیان هەیە دەتوانن بەشداری پڕۆسەکە بکەن، جگە لە سزادراوانی چاکسازییەکان.

لێدوانی فەرمی: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان بە ئاڤای گوت، "نەک هەر لە هەرێمی کوردستان، بەڵکو لە تەواوی عێراق سزادراوانی چاکسازییەکان لە دەنگدان بێبەش دەبن و هیچ بنکەیەکی دەنگدانیان نابێت، چونکە سزادراوان مافی دەنگدانیان نییە".

ئەوەی پێویستە بیزانیت: زیاتر لە پێنج هەزار کەس سزادراون و لە چاکسازییەکانی هەرێمی کوردستان هەن، لەو ژمارەیە دوو هەزار و 128 کەس مافی دەنگدانیان هەیە و ناتوانن دەنگ بدەن.