چوار هەزار پارچەزەویی دیكە بە فەرمانبەرانی هەولێر دەدرێت

ئاڤا نیوز

سبەی چوار هەزار پارچەزەویی دیكە لە سنووری شارەوانیی هەولێر بەسەر فەرمانبەران دابەش دەكرێت، سەرۆكی شارەوانیی هەولێریش دەڵێت، بەم قۆناغە نوێیەوە، كۆی ئەوانەی لە سنووری شارەوانیی هەولێر لە پێدانی زەوی سوودمەندبوونە دەگاتە زیاتر لە 28 هەزار فەرمانبەر.

چیرۆکی سەرەکی: لە سنووری سەنتەری شاری هەولێر و 14 شارەوانیی دیكەی پارێزگاكە، نزیكەی 55 هەزار فەرمانبەری مەدەنی و سەربازی لە وەرگرتنی پارچەزەوی سوودمەندبوونە، لەگەڵ دابەشكردنی چوار هەزار پارچەزەویی دیكە كە بڕیارە سبەی دووشەممە 10ـی تشرینی دووەم، تیروپشكیان بۆ بكرێت، كۆی سوودمەندبووان لە وەرگرتنی زەوی لە پارێزگای هەولێر دەگاتە 59 هەزار كەس.

لێدوانی فەرمی: كارزان عەبدولهادی، سەرۆكی شارەوانیی هەولێر تایبەت بە ئاڤا ڕایگەیاند، سبەی چوار هەزار پارچەزەویی دیكە بەسەر فەرمانبەرانی سەنتەری شاری هەولێر دابەش دەكرێت و تیروپشك بۆ ناوی سوودمەندبووان دەكرێت.

ئاماژەی بەوەشكرد، پێشتر بە سێ قۆناغ، 24 هەزار و 500 پارچە زەوی لە سنووری شارەوانیی هەولێر دابەشكراون، سبەش قۆناغی چوارەمی دابەشكردنی زەوی دەستپێدەكات كە چوار هەزار پارچەزەوی بەو فەرمانبەرانە دەدرێت كە كارتی زانیارییان لە هەولێرە.

ئەوەی پێویستە بیزانیت: جگە لە سنووری شارەوانیی سەنتەری هەولێر، تاكو ئێستا لە سنووری شارەوانییەكانی بەحرکە، قوشتەپە، شەمامک، مەخموور، دیبەگە، قەراج، ڕزگاری، کەورگۆسک، سێبیران، عەنکاوە، كەسنەزان، بنەسڵاوە و دارەتوو، نزیكەی 30 هەزار پارچەزەوی دابەش كراون.