ئەحمەد شەرع لەلایەن دۆناڵد ترەمپەوە پێشوازی لێدەکرێتەوە

ئاڤا نیوز

ئەحمەد شەرع، سەرۆككۆماری سووریا بە سەردانێک گەیشتە ئەمریكا و لە چوارچێوەی ئەم سەردانەیدا بڕیارە ئەمڕۆ دووشەممە لەگەڵ دۆناڵد ترەمپ، سەرۆكی ئەمریكا كۆببێتەوە و چەند ڕێككەوتنێکیش واژۆ بكەن.

زانیاریی بەدەستهاتوو: لە میانی دیدارێکی ئەحمەد شەرع، سەرۆککۆماری سووریا لەگەڵ شاندێکی ئەندامانی کۆمەڵگەی سووریا لە واشنتن ئاماژەی بەوەکرد، لە ماوەی 11 مانگدا دەستکەوتی گەورەی بەدەستهێناوە و گەیشتووەتە قۆناغێکی گرنگ.

زانیاریی زیاتر: تۆم باراک، نێردەی سەرۆکی ئەمریکا بۆ کاروباری سووریا ڕایگەیاند، واشنتن زۆر حەزی لە پاڵپشتیکردنی دەستپێشخەرییەکانە کە ئاسانکاری بۆ گەڕانەوەی سووریا بۆ کۆمەڵگەی ناوچەیی و نێودەوڵەتیی دەکات.

بەتەنیشت ئەم بابەتەوە: کارۆلین لیڤیت، سکرتێری ڕۆژنامەوانی کۆشکی سپی ڕایگەیاند، ئەم سەردانە "بەشێکە لە هەوڵەکانی سەرۆک ترەمپ لە بواری دیپلۆماسیدا بۆ ئەوەی لەگەڵ هەر کەسێک لە سەرانسەری جیهاندا کۆببێتەوە لە پێناوی ئاشتیی دا.

ئەوەی پێشبینی دەکرێت: لە چوارچێوەی ئەم سەردانە دا بڕیارە دیمەشق ڕێككەوتنێک واژۆ بكات كە بە فەرمی ببێتە ئەندامی هاوپەیمانیەتیی نێودەوڵەتیی دژی داعش.

لەلایەکی دیکەوە: لە چەند ڕۆژی ڕابردوو دا ئەنجوومەنی ئاسایشی نێودەوڵەتی و ویلایەتە یەكگرتووەكانی ئەمریكا بە فەرمیی ئەحمەد شەرعی لە لیستی تیرۆر دەرهێنا.

بۆچی گرنگە: ئەم سەردانەی سەرۆککۆماری سووریا بۆ واشنتن، یەکەم سەردانی مێژووییە لە دوای سەربەخۆیی وڵاتەکەی لە ساڵی 1946.