ناوەڕۆکی کۆبوونەوەی شاندی پارتی و نەتەوەیەکگرتووەکان لەبارەی ھەڵبژاردنەوە

ئاڤا نیوز

 

پارتی دیموکراتی کوردستان لە کۆبوونەوەی لەگەڵ یونامی ئامادەیی خۆی بۆ هەڵبژاردنی پەرلەمانی کوردستان دووپات دەکاتەوە، بەڵام بەو مەرجەی دوور بێت لە دیزاینی پێشوەختە. 

چیرۆکی سەرەکی: ڕۆژی  یەکشەممە 07-04-2024 د. هێمن هەورامانی، ئەندامی مەکتەبی سیاسی، ئامینا زکری، ئەندامی مەکتەبی سیاسی و جەعفەر ئیمینکی ئەندامی کۆمیتەی ناوەندیی پارتی لەبارەی پرسی هەڵبژاردنی خولی شەشەمی پەرلەمانی کوردستان لەگەڵ شاندی یونامی کۆبوونەوە. 

 

بابەتی ستراتیژی: شاندی یونامی جەختیان لە گرنگی و بایەخی بەڕێوەچوونی هەڵبژاردنێکی جێمتمانەی هەمووان و بەشداری هەمووان کردەوە و ڕایانگەیاند: بە پەرۆشن بۆ ئاگاداربوون لە وردەکاریی ڕا و سەرنج و تیبینی و بۆچوونەکانی پارتی دیموکراتی کوردستان. 

 

ڕاگەیێنراوی فەرمی: شاندی پارتی بۆیان روونکردنەوە کە یۆنامی شایەتی ئەوەیە دوو ساڵ بوو پارتی داوای هەڵبژاردنی  دەکرد و پابەند بوو بە ئەنجامدانی و چوار جار سەرۆکی هەرێمی کوردستان مەرسوومی دەرکرد و هەندێ لایەنی دیکە چۆن ڕێگر بوون و چۆن نەیاندەهێشت دانیشتنەکانی پەرلەمان بۆ گفتوگۆکردنی ڕەشنووسی هەمواری یاسای هەڵبژاردن بێت و چۆن هەر لە سەرەتاوە دژی کاراکردنەوەی کۆمسیۆن بوون.

 

زانیاریی زیاتر: بۆمان ڕوونکردنەوە کە ئێستاش پارتی ئامادەی هەڵبژاردنە بەمەرجێک دوور بێت لە دیزاینی پێشوەختە و دەبێت یونامی لەسەر خەت بێت بۆ چارەسەری کێشە تەکنیکیەکان و زامنکردنی پاکی و بێگەردی کۆی پرۆسەکە و دوور بێت لەو ئامادەکارییە پێشوەختەی هەندێ لایەنی ناوخۆیی و دەرەکی بۆ دزینی کورسییەکانی پارتی و ئیرادەی دەنگدەران بەرنامەڕێژییان بۆ کردووە.