وەرزی کێڵانی زەوی و داچاندنی گەنم و جۆ لە هەرێمی کوردستان دەستپێدەکات

ئاڤا نیوز

 

دوای هاتنی شەپۆلی بارانبارین لە هەرێمی کوردستان، جووتیاران دەستیان بە کێڵانی زەوییەکان و چاندنی دانەوێڵەی گەنم و جۆ کردووە. بەڕێوەبەری گشتیی کشتوکاڵی هەولێریش دەڵێت، لە ماوەی ڕابردوو بنەتۆی باشمان بەسەر جووتیاران دابەش کردووە.

 

وێنە گەورەکە: ساڵانە بەپێی ڕێژەی بارانبارین بەو مەرجەی پەڵە بدات، سەرەتای مانگی 10 وەرزی داچاندنی گەنم و جۆ دەستپێدەکات، بەڵام ئەمساڵ بارانبارین دواکەوت بۆیە لە ناوەڕاستی مانگی 11 وەرزی کێڵانی زەوی و چاندنی گەنم و جۆ دەستپێکرد.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر، بە ئاڤا میدیای ڕاگەیاند، دوای هاتنی ئەم شەپۆڵەی بارانبارین لە بەشێک لە ناوچەکانی هەرێمی کوردستان جووتیاران دەستیان کردووە بە کێڵانی زەوییەکانیان و داچاندنی دانەوێڵەی گەنم و جۆ.

 

زانیاریی زیاتر: بەڕێوەبەری گشتیی کشتوکاڵی هەولێر، دەڵێت، لە ماوەی ڕابردوو بنەتۆی باشمان بەسەر جووتیاران دابەش کردووە، کە لە هەرێمی کوردستان بەشێوەیەکی زانستی بەرهەم هاتووە، بەرگەی گۆڕانکاریی کەشوهەوای کوردستان دەگرێت.

 

لەلایەکی دیکەوە: شێخ دارا، پێشکەشکاری کەشوهەوای ئاڤا ڕایگەیاند، هەر جووتیارێک زەوی هەیە با دەست بکات بە کێڵان و داچاندنی گەنمەکانیان چونکە ئێستا کاتەکەی لەبارە.