زیاتر لە 500 بیر لە سنووری هەولێر داخراون

ئاڤا نیوز

 

قۆناغی دووەمی پڕۆژەی فریاگوزاریی خێرای ئاوی هەولێر، گەیشتووە بە بەشێکی زۆری گەڕەکەکانی شاری هەولێر و کێشەی کەمئاویان چارەسەر بووە، بەو هۆیەشەوە تاوەکوو ئێستا 560 بیر داخراون.

 

وێنە گەورەکە: پڕۆژەی فریاگوزاریی خێرای ئاوی هەولێر یەکێکە لە پرۆژە ستراتیژییەکانی کابینەی نۆیەم، کێشەی کەمئاوی تا 30 ساڵی داهاتوو لە هەولێر چارەسەر دەکات. جگە لەوەی هۆکارێکە بۆ پارێزگاریکردن لە سامانی ئاوی ژێرزەوی و سەدان بیر داخراون.

 

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای گوت، "قۆناغی دووەم تەواو بووە، ئێستا 560 بیر داخراون، تاوەکوو سەرەتای ساڵی داهاتوو ژمارەکە بەرز دەبێتەوە بۆ 800 بیر، بە تەواوبوونی پرۆژەکە دەگاتە سەرووی هەزار بیر، کە بەهۆی پڕۆژەی فریاگوزاریی خێرای ئاو دادەخرێن."

 

ئەمەش بزانە: ئەو گەڕەکانەی لە قۆناغی دووەم ئاویان پێگەیشتووە، 32ی پارک، بەهاری نوێ، ماردین، شادی، پیشەسازی باشوور، عەنکاوە، بەختیاری، وەزیران و دەورووبەری، ئێستا کار لەسەر بەحرکە و دەورووبەری دەکرێت، هاوکات ئەو کار لەسەر گۆڕینی سیستمی بەشێکی گەڕەکەکان دەکرێت، ئەو شوێنانەی ئاویان لە بیر بۆ دابین دەکرا، ئاویان بۆ ڕادەکێشرێت و دێنە چوارچێوەی پڕۆژەکە.