هاوپەیمانیی عەرەبی لە کەرکووک دەچێتە ناو هاوپەیمانێتییەکەی خەمیس خەنجەر

ئاڤا نیوز

هاوپەیمانیی عەرەبی لە کەرکووک، کە لە هەڵبژاردنە پەرلەمانییەکەی 11ـی ئەم مانگەی عێراق، یەک کورسییان بەدەستهێنا بڕیاریاندا بچنە ناو هاوپەیمانی سیادە، کە خەمیس خەنجەر سەرۆکایەتی دەکات، بەوەش کورسییەکانی هاوپەیمانێتییەکەی خەنجەر دەبێتە 10 کورسی.

چیرۆکی سەرەکی: لە هەڵبژاردنەکەی 11ی ئەم مانگەدا، هاوپەیمانی عەرەبی لە کەرکووک، کە ڕاکان جبووری، پارێزگاری بە وەکالەتی پێشووی کەرکووک سەرپەرشتی دەکرد و کوڕەکەی بەناوی قوتەیبە جبووری، سەرۆک لیست بوو، 53 هەزار و 46 دەنگی بەدەستهێنا و کورسییەکی پەرلەمانی بردەوە.

ڕاگەیێنراوی فەرمی: قوتەیبە ڕاکان جبووری، سەرۆک لیست و کاندیدی دەرچووی هاوپەیمانیی عەرەبی لە کەرکووک لە ڕاگەیێنراوێکدا دەڵێت، بە فەرمی بووەتە بەشێک لە هاوپەیمانی سیادە، بە سەرۆکایەتی خەمیس خەنجەر، ئەوەش لە چوارچێوەی ئەو بەرپرسیاریەتییەی خەڵکی کەرکووک پێی بەخشیوون تا کار بۆ خواستی خەڵکی پارێزگاکە بکەن.

ئاماژەی بەوەشکردووە، کار بۆ گەڕانەوەی دۆخەکە "بۆسەر ڕاستەڕێگای خۆی" دەکات، ئەویش بەجۆرێک دەبێت ئارامی کەرکووک و پاراستنی مافی پێکهاتەکانی گەرەنتی بکرێت.