نەوتی سپی بەسەر ناوەندەکانی خوێندن دابەش دەکرێت

ئاڤا نیوز

حکومەتی هەرێمی کوردستان، نەوتی سپی بۆ سەرجەم پەروەردەکان دابین کردووە، چەند ڕۆژێکە لە دهۆک پرۆسەکە دەستیپێکردووە و هەفتەی داهاتوو لە هەولێریش دەستپێدەکات.

وێنە گەورەکە: لەگەڵ نزیکبوونەوە لە وەرزی سەرما، وەزارەتی پەروەردەی حکومەتی هەرێمی کوردستان لەڕێگەی چەند کۆمپانیایەک نەوتی سپی بۆ ناوەندەکانی خوێندنی هەرێمی کوردستان دابین دەکات، ئەمساڵ بڕی هەشت ملیۆن و 500 هەزار لیتر نەوتی سپی لە سەرجەم ناوەندەکانی خوێندن دابەش دەکرێت.

لێدوانی فەرمی: لوقمان سەعید، بەڕێوەبەری گشتیی پەروەردەی هەولێر بە ئاڤای گوت، "لیژنەکان لەسەر ئاستی هەشت پەروەردە پێکهێنراون، چەند ڕێکارێکی هونەری ماون تەواو بکرێن، هەفتەی داهاتوو لە سنووری هەشت پەروەردە دەست بە دابەشکردنی نەوت دەکرێت، دوو ملیۆن لیتر دابینکراوە."

لەلایەکی دیکەوە: عومەر عەلی، بەڕێوەبەری گشتیی پەروەردەی دهۆک بە ئاڤای ڕاگەیاند، "ماوەی سێ ڕۆژە پرۆسەکە لە سنووری دهۆک دەستیپێکردووە و یەک ملیۆن و 900 هەزار لیتر دابینکراوە، لە قۆناغی یەکەم لەو ناوەندانە دابەش دەکرێت کە لە سنووری ناوچە شاخاوییەکانن."