عەدنان موفتی: بەشێک لە بڕیارەکانی دادگەی فیدراڵی نادەستوورین

ئاڤا نیوز

 

سەرۆکی پێشووتری پەرلەمانی کوردستان ڕایدەگەیێنێت، بەشێک لە بڕیارەکانی دادگەی فیدراڵی زیاد لە سنووری خۆیان ڕۆیشتوون و پێچەوانەی مافەكانی هەرێمی کوردستانن.

 

لێدوانی فەرمی: عەدنان موفتی، سەرۆکی پێشووتری پەرلەمانی کوردستان دەڵێت، ئێستا لە عێراقدا دیموکراسییەتی تەواو نییە، بۆیە پێویستە هەموو پێکهاتەکان نوێنەری خۆیان هەبێت بۆ ئەوەی بەرگری لە مافەکانیان بکەن.

 

ئەوەی پێویستە بیزانیت: دادگەی فیدراڵی، کورسیی پێکهاتەکانی لە بەغدا و مووسڵ هەڵنەوەشاندووەتەوە و ئەم بڕیارەی تەنیا بۆ هەرێمی کوردستان بووە، بەمەش ئەو بڕیارانە بە لایەنگریی سیاسی لێكدەدرێنەوە. عەدنان موفتی ئەمەی گوتووە.

 

زانیاریی زیاتر: سەرۆکی پێشووتری پەرلەمان دەڵێت، ڕاستە بڕیارەکانی دادگەی فیدڕاڵی کۆتایین، بەڵام دەستوور لە سەرووی هەموو یاساکانەوەیە و بەشێک لە بڕیارەکانی ئەو دادگەیە زیاد لە سنووری خۆیان ڕۆشتوون، لابردنی کورسیی پێکهاتەکان کە بە یاسا ڕێکخراوە و یەکێتی و پارتی دەنگیان لەسەر داوە، پێشێلکارین بەرامبەر بە یاساكانی هەرێمی کوردستان.