خەمیس خەنجەر: بەپەلە کار لەسەر پێکهێنانی حکومەت دەکەین

ئاڤا نیوز

سەرۆکی هاوپەیمانی "سیادە" جەخت لەوە دەکاتەوە کە هێزە سوننییەکان بەردەوامن لە جێبەجێکردنی ئەوەی بەڵێنیان بە جەماوەرەکەیان داوە، بەشێوەیەک کە لەگەڵ پێویستی بەدیهێنانی سەقامگیری و پەلەکردن لە هەڵبژاردنی سەرۆکایەتییەکان و تەواوکردنی پێکهاتەی حکومەتدا بگونجێت.

چیرۆکی سەرەکی: ئەمڕۆ یەکشەممە، سەرکردەی لایەنە سوننییەکان کە پێکهاتبوون لە هەریەک لە موسەننا سامەڕائی سەرۆکی هاوپەیمانی عەزم، محەممەد حەلبووسی، سەرۆکی حیزبی تەقەدووم، سابت عەباسی، سەرۆکی هاوپەیمانی حەسم و بەدر فەحل، پارێزگاری سەڵاحەددین، لە ماڵی خەمیس خەنجەر، سەرۆکی هاوپەیمانی سیادە کۆبوونەوە.

لێدوانی ڕۆژنامەوانی: پێش کۆبوونەوەکە خەمیس خەنجەر، سەرۆکی هاوپەیمانی "سیادە"  لە کۆنگرەیەکی ڕۆژنامەوانیدا ڕایگەیاند، کۆبوونەوەی هێزە سوننییەکان باس لە دانانی پلانێکی گشتگیر و ئەو پێوەرانە دەکات کە لەسەری ڕێککەوتوون، بەمەبەستی ڕێگریکردن لە ناکۆکییەکان و بەشداریکردن لە پەلەکردن لە پێکهێنانی جومگەکانی دەوڵەت.

لە هەمان کاتدا: خەنجەر ئاماژەی بەوەشکرد، کە هەماهەنگییەکی بەردەوام لەگەڵ سەرکردە عێراقییەکان هەیە، لەوانەش سەرکردایەتیی هەرێمی کوردستان، بە ئامانجی زیادکردنی گفتوگۆکان و تێپەڕاندنی ئەو بەربەستانەی کە ڕێگری لە پێکهێنانی حکومەتی داهاتوو دەکەن.

ئەوەی پێویستە بیزانیت: ڕۆژی شەممە، خەمیس خەنجەر سەرۆکی هاوپەیمانی "سیادە"، بانگهێشتی هاوپەیمانێتی و حیزبە براوەکانی کرد بۆ کۆبوونەوەیەک بە مەبەستی گفتوگۆکردن لەسەر شایستەکانی داهاتوو.