هۆشداری بە وارسی شەهیدان دەدرێت

ئاڤا نیوز

وەزارەتی کاروباری شەهیدان و ئەنفالکراوانی هەرێمی كوردستان، هۆشداری بە وارسی شەهیدان دەدات بە زووترین کات، کارتی نیشتمانی بهێنن.

وێنە گەورەکە: لە چوارچێوەی ڕێکخستن و پێداچوونەوە بە دۆسییەکانی شەهیدان، دەبێت سەرجەم وارسی شەهیدان کارتی نیشتمانی بێنن و کۆپییەک لە کارتی نیشتمانی بخرێتە ناو دۆسیەی شەهیدەکانیان.

لێدوانی فەرمی: ئەحمەد مام ڕەسووڵ، بەرێوەبەری گشتیی خزمەتگوزاری کەسوکاری شەهیدان و ئەنفالکراوان  بە ئاڤای وت، ئەم ڕێنماییە سەرتاسەرییە و دەبێت سەرجەم وارسی شەهیدان لە هەرێمی کوردستان و عێراق، کارتی نیشتمانییان لە ناو دۆسییەکانیان هەبێت، ئەم ڕێکارەش دەبێت پێش کۆتایی ئەمساڵ تەواو بکرێت، بۆیە پێویستە کەسوکاری شەهیدان لە زووترین کات کارتی نیشتمانی ببەن بۆ بەڕیوەبەرایەتی شەهیدان لە شارەکان و ئیدارە سەربەخۆکان.

باسی لەوەش کرد، دوای دەرچوونی ئەم ڕێنماییە لە عێراق، زیاتر لە 42 هەزار وارسی شەهیدان لە هەرێمی کوردستان کارتی نیشتمانی لەناو دۆسیەکانیان نەبوو، بۆیە چەندینجار ئاگادارمان کردوونەتەوە دەبێت کارتی نیشتمانی بێنن، بەڵام بەداخەوە تا ئێستا نزیکەی 19 هەزار وارسی شەهیدان کارتی نیشتمانیان نەهێناوە، کە ڕەنگە ئەمە کێشەیان بۆ دروست بکات.

زانیاریی زیاتر: بەرێوەبەری گشتیی خزمەتگوزاری کەسوکاری شەهیدان و ئەنفالکراوان، دووپاتیشی کردەوە تا ئێستا مووچەی هیچ وارسێک لەسەر نەهێنانی کارتی نیشتمانی رانەگیراوە، بەڵام کاتی کەمیان لەبەردەم ماوە و پێویستە تا پێش کۆتایی ئەمساڵ کارتی نیشتمانی بێنن.