عێراق ڕێوشوێنی نوێ بۆ هاوردەکردنی ئۆتۆمبێل دادەنێت

ئاڤا نیوز

وەزارەتی بازرگانی عێراق ڕایدەگەیێنێت، ڕێوشوێنی نوێی ئامادەکردووە بۆ ڕێکخستنی هاوردەکردنی ئۆتۆمبێل. ئەم هەنگاوە لە چوارچێوەی پلانێکی فراواندایە بۆ کەمکردنەوەی ژمارەی ئۆتۆمبێلە هاوردەکراوەکان و باشترکردنی هاتووچۆ لە شەقامەکان.

بۆچی گرنگە: قەرەباڵغیی هاتووچۆ لە زۆربەی شارەکانی عێراق، بەتایبەت بەغدا، بووەتە یەکێک لە گەورەترین کێشەکان. زیادبوونی بێ پلانی هاوردەکردنی ئۆتۆمبێلیش، کاریگەریی نەرێنی هەبووە، ڕێکخستنەوەی ئەم پڕۆسەیە کاریگەرییەکی ئەرێنی لەسەر کەمکردنەوەی قەرەباڵغی، باشترکردنی کوالێتی ژینگە و بەرزکردنەوەی ئاستی سەلامەتی هاتووچۆ دەبێت.

لێدوانی فەرمی: محەمەد حەنوون، وتەبێژی فەرمیی وەزارەتی بازرگانی بە ڕۆژنامەی "سەباح"ـی ڕاگەیاند، ڕێوشوێنە پێشنیازکراوەکان ئاراستەی ئەنجوومەنی وەزیران کراون و لە قۆناغی لێکۆڵینەوەدان، چاوەڕێی پەسەندکردنی کۆتایی دەکرێت بۆ ئەوەی بچنە بواری جێبەجێکردنەوە.

ئەوەی ئێستا ڕوودەدات: حەنوون وتیشی، "وەزارەتی بازرگانی لەگەڵ لایەنە حکومییە پەیوەندیدارەکان کار دەکات بۆ دۆزینەوەی چارەسەری گونجاو بۆ کەمکردنەوەی قەرەباڵغیی شەقامەکان و ڕێگریکردن لە زیادبوونی بێ پلانی هاوردەکردنی ئۆتۆمبێل. ئەمەش لە کاتێکدایە کە حکومەت پڕۆژەی دروستکردنی پرد و ڕێگای نوێی دەستپێکردووە بۆ چارەسەرکردنی ئەم قەیرانە.

زانیاریی زیاتر: ناوبراو ئاماژەی بەوەشدا، ئامانجی ڕێوشوێنە نوێیەکان ئەوەیە جارێکی دیکە جۆر و تایبەتمەندییەکانی ئۆتۆمبێلە هاوردەکراوەکان و کۆمپانیا هاوردەکارەکان ڕێکبخرێنەوە. چونکە پێشتر گرنگیدان بە ژمارە نەک جۆر، بووە هۆی هاتنی ئۆتۆمبێلی نەگونجاو بۆ ژینگەی عێراق و ناتەبا لەگەڵ ستانداردەکان.