مەزڵووم عەبدی: پەیوەندیمان لەگەڵ حکومەتی تورکیا هەیە و ئەگەر بانگهێشت بکرێم دەچمە تورکیا

ئاڤا نیوز

فەرماندەی گشتیی هەسەدە بە سەرنج خستنە سەر ئەوەی کە بەشێک لە بەرپرسانی ڕۆژئاوای کوردستان لەگەڵ عەبدوڵڵا ئۆجەلان گفتوگۆیان کردووە، دەڵێت: بۆ سەرخستنی پرۆسەی ئاشتی و کێشەکانی ڕۆژئاوای کوردستان، پێویستە لایەنەکانی ڕۆژئاوای کوردستان و ئۆجەلان کۆببنەوە و ئەمە خواستی هەردوو لایەنە.

وێنە گەورەکە: هەوڵەکان بۆ سەرخستنی پرۆسەی ئاشتی لە تورکیا بەردەوامن و کاریگەری ڕاستەوخۆی کردووەتە سەر ڕاگەیاندنی ئاگربەست لەنێوان تورکیا و ڕۆژئاوای کوردستان.

لێدوانی فەرمی: مەزڵووم عەبدی، فەرماندەی گشتیی هەسەدە لە بەشی دووەمی چاوپێکەوتنەکەیدا لەگەڵ ئاژانسی مێزۆپۆتامیا کە ئەمڕۆ 24-11-2025 بڵاوکراوەتەوە ئاماژە بەوە دەدات "سیستمی ناناوەندێتی، سووریا بەهێزتر دەکات نەک لاواز".

بەتەنیشت ئەم بابەتەوە: مەزڵووم عەبدی سەرنج دەخاتە سەر ئەوەی هەرچەند پەیوەندییەکانیان فەرمی نین، بەڵام لە ڕێگای چەند کەناڵێکەوە پەیوەندییان لەگەڵ تورکیا دا هەیە و دەڵێت: دەمانەوێت پەیوەندییەکانمان زیاتر بەرەو پێش ببەین. ئێمە ئامادەین نیگەرانییە ئەمنییەکانی تورکیا بڕەوێنیەوە و پێویستە تورکیاش نیگەرانییەکانی ئێمە کە "داگیرکردنی" عەفرین و سەرێ کانییە، بڕەوێنێتەوە.

ئەوەی پێویستە بیزانیت: مەزڵووم عەبدی سەرنج دەخاتە سەر ئەوەی پرۆسەی ئاشتی لە نێوان تورکیا و پەکەکە ڕاستەوخۆ کاریگەری کردووەتە سەر ڕۆژئاوای کوردستان و دەڵێت: تەنانەت ئەو ئاگربەستەی لەگەڵ سوپای تورکیا ڕاگەیەنراوە بەهۆی ئەم پرۆسەیەوە بووە. ئەگەر پرۆسەکە سەربگرێت، ئاگربەستەکەش دەبێتە هەمیشەیی.