فەرمانی هەرێمیی بۆ خانەنشینکردنی پێشمەرگە پلەدارەکان دەرچوو

ئاڤا نیوز

سەرۆکی هەرێمی کوردستان واژۆی لەسەر خانەنشینکردنی پێشمەرگە پلەدارەکان کرد و لە چەند ڕۆژی داهاتوودا لە وەزارەتی پێشمەرگەوە مامەڵەکانیان تەواو دەکرێت. 

وێنە گەورەکە: لە ناوەڕاستی ساڵی ڕابردووەوە تا ئێستا هەزاران پلەدار و پێشمەرگە تەمەنیان گەیشتووەتە خانەنشینی، بەڵام پێویستیان بە فرمانی هەرێمی هەیە، بۆیە کارکردن لە مامەڵەکانیان دواکەوت.

زانیاریی زیاتر: نێچیرڤان بارزانی، سەرۆکی هەرێمی کوردستان فەرمانی هەرێمی بۆ خانەنشینکردنی پێشمەرگە پلەدارەکان دەرکردووە و ئێستا لە ئەنجوومەنی وەزیرانە، لە چەند ڕۆژی داهاتوودا فەرمانەکە دەگەڕێتەوە وەزارەتی پێشمەرگە و مامەڵەکانیان تەواو دەکرێت.

لێدوانی فەرمی: لیوا حاجی مەلا ئەمین، بەڕێوەبەری گشتیی خانەنشینی پێشمەرگە و کەمئەندامان بە ئاڤای گوت، ئەوانەی فەرمانی هەرێمییان بۆ دەرچووە، پلەکەیان لە ملازمەوە تاوەکو فەریق، ڕەنگە لەگەڵ لیستی مووچەی مانگی 11 مووچە بۆ خانەنشینە پلەدارەکان ببەسترێت.

لەبارەی ژمارەی خانەنشینانەوە لیوا حاجی مەلا ئەمین باسی لەوەکرد، فەرمانەکە زیاتر لە دوو هەزار و 200 کەس دەگرێتەوە، ئەو پلەدارانەن لە سەرەتای ئەمساڵەوە تا ئێستا تەمەنیان گەیشتووەتە خانەنشینی و سەر بە وەزارەتی پێشمەرگە و یەکەکانی حەفتا و هەشتان.

ئەوەی پێویستە بیزانیت: بەگشتی لە سەرەتای ئەمساڵەوە نزیکەی 7 هەزار پێشمەرگە و پلەدار گەیشتوونە تەمەنی خانەنشینی، دۆسیەی بەشێکی زۆریان تەواو بووە، هەزار و 530ـی پێشمەرگە لەگەڵ دابەشکردنی مووچەی مانگەکانی 9 و 10 مووچەیان بۆ دەبەسترێت.