سەرنج و پێشنیازەکانی ئۆجەلان تۆمار دەکرێن و بۆ کۆمیسیۆنە پەرلەمانییەکە دەخرێنەڕوو

ئاڤا نیوز

 

سەرجەم سەرنج و پێشنیازەكانی عەبدوڵڵا ئۆجەلان لە میانی كۆبوونەوەكەی ئەمڕۆدا تۆمار دەكرێن، دواتر لەلایەن شاندی كۆمیسیۆنە پەرلەمانییەكە پێشكەشی سەرۆكی كۆمیسیۆن دەكرێن و پاشان ئەندامانی كۆمیسیۆنەكە تاوتوێی دەكەن.

 

چیرۆكی سەرەكی: دوای ئەوەی 21-11-2025 كۆمیسیۆنی یەكڕیزیی نیشتمانی، برایەتی و دیموكراسی بە دەنگی سێ لەسەر پێنجی ئەندامانی، بڕیاری پێكهێنانی لیژنەیەكی دا بۆ ئەوەی سەردانی ئۆجەلان بكەن، ئەمڕۆ شاندەكە گەیشتنە دوورگەی ئیمڕاڵی و لەگەڵ ئۆجەلان لە كۆبوونەوە.

 

زانیاری بەدەست هاتوو: ئاژانسی هەواڵی مێزۆپۆتامیا بڵاوی كردووەتەوە سەرجەم سەرنج و پێشنیازەكانی ئۆجەلان تۆمار دەكرێن، دواتر لەلایەن شاندی كۆمیسیۆنە پەرلەمانییەكە پێشكەشی نوعمان كورتوڵموش، سەرۆكی كۆمیسیۆنە كە هاوكات سەرۆكی پەرلەمانیشە دەكرێن و پاشان ئەندامانی كۆمیسیۆنەكە تاوتوێی دەكەن.

 

بە تەنیشت ئەم بابەتەوە: لای خۆیشیەوە  NTV بڵاوی كردووەتەوە سەرجەم ئامادەكارییەكانی سەردانەكە لەلایەن میت-ەوە ڕێكخراون. تەواوی كۆبوونەوەكەش بە دەنگ و ڕەنگ لەلایەن میتەوە تۆمار كراوە.

 

پێویستە ئەمەش بزانیت: ئەمە لە كاتێكدایە چەند ڕۆژێك لەمەوبەر ئاژانسی مێزۆپۆتامیا ڕایگەیاندبوو ناوەڕۆكی كۆبونەوەكە بۆ ماوەی 10 ساڵ بە نهێنی دەهێڵرێتەوە و هاوشێوەی كۆبوونەوە گرنگەكانی دیكەی كۆمیسیۆنەكە بۆ ڕای گشتی ئاشكرا ناكرێت.

 

لە لایەكی دیكەوە: ئەندامانی شاندەكە پێك دێن لە هەریەك لە گوڵستان كڵچ كۆچییغیت، جێگری سەرۆكی فراكسیۆنی دەم پارتی لە پەرلەمانی توركیا؛ حوسێن یایمان، یاریدەدەری سەرۆكی گشتیی ئاك پارتی و فەتی یڵدز، یاریدەدەری سەرۆكی گشتیی مەهەپە بۆ كاروباری یاسایی و هەڵبژاردن.

 

لە كۆبوونەوەكەدا باسی چی دەكرێت: ئاماژە بەوە دەدرێت كۆبوونەوەكە لە دووبەش پێك هاتووە. لە بەشی یەكەمدا ئۆجەلان لەبارەی ڕەخساندنی زەمینەسازیی یاسایی بۆ سەرخستنی پرۆسەكە و هاوپەیمانێتیی كورد و توركەوە دەدوێت كە خۆی دەبینێتەوە لە داننان بە مافەكانی كورد لە ڕووی یاسایی و دەركردنی یاسا بۆ گەڕانەوەی گەریلاكان بۆ ناو كەسوكاریان.

بەشی دووەمی كۆبوونەوەكەش تەرخان كراوە بۆ پرسیاری ئەندامانی شاندەكە لە ئۆجەلان و وەڵامدانەوەیان. میدیاكان ئاماژە بەوە دەدەن پرسیاری ئەوە لە ئۆجەلان دەكرێت داخۆ پەیامەكەی بۆ پەكەكە لە 27ی شوبات كە داوای چەكدانان و خۆهەڵوەشاندنەوەی لە پەكەكە كرد، هێزەكانی سوریای دیموكرات (هەسەدە)ش دەگرێتەوە یان نا. 

بۆچی گرنگە: بە كۆبوونەوەی شاندەكە لەگەڵ ئۆجەلان، كۆتایی بە قۆناغی گوێگرتنی كۆمیسیۆنەكە دێت لە سەرنج  و پێشنیازەكان كە تاكوو ئێستا بۆ ئەم مەبەستە 18 كۆبوونەوەی كردووە.

بۆ ئامادەكردنی ڕاپۆرتی كۆتایی، ئەندامانی كۆمیسیۆنەكە تاوەكو ئێوارەی 28ی مانگ سەرۆكایەتیی پەرلەمانی توركیا لە تێڕوانین و سەرنجەكانیان ئاگادار دەكەنەوە.

لە ڕاپۆرتی كۆتاییدا پێشنیازەكان دەخرێنە ڕوو بۆ ئەوەی هەنگاوی پێویست بنرێت بە مەبەستی ڕەخساندنی زەمینەسازیی یاسایی بۆ سەرخستنی پرۆسەی ئاشتی. 

باكگراوند: پەكەكە ماوەی 47 ساڵ لە خەباتی چەكداریی بەردەوام بوو دژی دەوڵەتی توركیا، بەهۆی ئەمەوە زیاتر لە 40 هەزار كەس لەو نێوەندەدا كوژراون، ڕۆژی هەینی، 11-7-2025 لە چوارچێوەی هەوڵەكان بۆ سەرخستنی پڕۆسەی ئاشتی، پارتی كرێكارانی كوردستان لەسەر داوای عەبدوڵڵا ئۆجەلان، ڕێبەری زیندانی كراوی پەكەكە بۆ خۆ هەڵوەشاندنەوە و كۆتایی هێنان بە خەباتی چەكداریی، نزیكە 50 چەكداری ئەو ڕێكخراوە چەكەكانیان سووتاند.