دابەشکردنی مووچەی مانگی نۆ لە کوردستان دەکەوێتە هەفتەی داهاتوو

ئاڤا نیوز

لە عێراق تاوەکو ئێستا دەست بە دابەشکردنی مووچەی فەرمانبەران نەکراوە، بە هۆیەوە مووچەی مانگی نۆی فەرمانبەرانی هەرێمی کوردستانیش دواکەوتووە و چاوەڕوان دەکرێت بکەوێتە هەفتەی داهاتوو.

وێنە گەورەکە: حکومەتی عێراق تاوەکو ئێستا لە هەوڵدایە بۆ دابەشکردنی مووچەی مانگی 11ی فەرمانبەرانی خۆی و بەشێکی زۆری وەزارەتەکانیش مووچەیان بەسەردا دابەش نەکراوە، تەنها بە ژمارە مووچە خراوەتە سەر هەژماری ئەو وەزارەتانە بەڵام پارە نەخراوەتە سەر هەژماری فەرمانبەران.

لێدوانی فەرمی: لەبارەی دواکەوتنی دابەشکردنی مووچە لە عێراق بەرپرسێکی باڵای حکومەتی عێراق بە ئاڤای گوت: بڕیار بوو ئەمڕۆ دەست بە دابەشکردنی مووچە بکرێت بەڵام تا ئێستا دەست بە دابەشکردنی نەکراوە.

لەبارەی هۆکاری دابەشنەکردنی پارەکە ئەو بەرپرسە باسی لەوەشکرد: لە عێراق کێشەی پارەی کاش هەیە و حکومەت پارەی پێویستی لەبەردەست نییە، تەیف سامی، وەزیری دارایی لەگەڵ بانکی ناوەندی لەسەر خەتە بۆ ئەوەی 8 تریلیۆن و 500 ملیار دینار پەیدا بکات بۆ دابەشکردنی مووچە، بەڵام تا ئێستا نەیتوانیوە ئەو بڕە پارەیە پەیا بکات.

لەلایەکی دیکەوە: دابەشکردنی مووچە لە عێراق ڕاستەوخۆ پەیوەندی بە مووچەی خەڵکی کوردستانەوە هەیە، تاوەکو لە عێراق دەستپێنەکات و مووچەی چەند وەزارەتێک نەدرێت تەیف سامی مووچەی مووچەخۆرانی کوردستان نانێرێت.

زانیاریی تایبەت: بەپێی بەدواداچوونەکانی ئاڤا، بە هەموو پێوەرەکان دابەشکردنی مووچەی مانگی 9 لە کوردستان دەکەوێتە هەفتەی داهاتوو، پێشبینیش دەکرێت ڕۆژی پێنجشەممە بەغدا پارە بنێرێت، ئەگەرنا سەرەتای هەفتەی داهاتوو.