لە شەقامێکی دیکەی هەولێر خێرایی ڕێگەپێدراو بەرز کرایەوە

ئاڤا نیوز

لە ڕێگای هەولێر – کەرکووک، لە بەرزە پردی شەقامی 100 مەتری تا بەرزە پردی شەقامی 120 مەتری، خێرایی ڕێگەپێدراو لە 60 کیلۆمەتر لە کاتژمێرێک بۆ 80 کیلۆمەتر لە کاتژمێرێک بەرز کرایەوە.

وێنە گەورەکە: شەقام و ڕێگاکان لە ناوەوە و دەرەوەی شارەکان، بەپێی قەرەباڵغییان و بە ئامانج کارئاسانی لە هاتووچۆی هاونیشتمانیان، بەردەوام بە ئەندازەی نوێ ڕێکخستنیان بۆ دەکرێت.

ئەوەی ئێستا ڕوودەدات: بەڕێوەبەرایەتیی هاتووچۆی هەولێر، شۆفێران ئاگادار دەکاتەوە، کە خێرایی ڕێگەپێدارو لە ڕێگای هەولێر- کەرکووک، لە بەرزە پردی چوارڕیانی جیهان لە شەقامی 100 مەترییەوە تا بەرزە پردی 120 مەتری،  لە 60 کیلۆمەتر لە کاتژمێرێک بۆ 80 کیلۆمەتر لە کاتژمێرێک بەرز کرایەوە.

ئەوەی پێویستە بیزانیت:  ئەم بڕیارە ئەمڕۆ دووشەممە 24-11-2025، لە کاتژمێر شەشی ئێوارە دەچێتە باری جێبەجێ کردن.

لێدوانی فەرمی: سروە یاسین، بەڕێوەبەری ئەندازەی هاتووچۆی هەولێر بە ئاڤای گوت:  هەر شەقامێک گۆڕانکاری لە خێرایی بکرێت، هێمای هاتووچۆ بۆ دادەنرێت، پێویستی بە هەر ڕێکارێک هەبێت بۆ دووبارە ڕێکخستنەوەی ئەو شەقام و ڕێگایانە، بۆی ئەنجام دەدەین.

باکگراوند: ڕۆژی شەممەی ڕابردوو 22-11-2025 لە جووتسایدی لاوان لە هەولێر، بەهەمان شێوە خێرایی ڕێگەپێدراو لە 60 کیلۆمەتر لە کاتژمێرێک بۆ 80 کیلۆمەتر لە کاتژمێرێک بەرز کرایەوە.